«Šaścipałosnaja aŭtastrada» da prezidenctva. Biesparadki ŭ Francyi ŭzmacniajuć šancy Lo Pen na prezidenctva

U subotu, 17 kastryčnika, pa Francyi prakacilisia najbujniejšyja za niekalki hadoŭ biesparadki. Ich udzielniki rabavali kramy, padpalvali budynki i paškodžvali dziaržaŭnyja ŭstanovy. Na nastupnuju noč rabavańni praciahnulisia, u tym liku ŭ zamožnych rajonach Paryža.

U niadzielu Makron źviarnuŭsia da krainy, ale nie abviaściŭ nadzvyčajnaha stanovišča. Apanienty i byłyja paplečniki raskrytykavali jaho vystup za adsutnaść kankretnych rašeńniaŭ dla adnaŭleńnia paradku.

U paniadziełak, 19 kastryčnika, premjer-ministr Siebaśćian Lekarniu abviaściŭ pra ŭviadzieńnie kamiendanckaj hadziny ŭ asobnych miescach. Makron admoviŭsia pryniać adstaŭku ministra ŭnutranych spraŭ i daručyŭ pravieryć mahčymyja pravały ŭ zbory infarmacyi i padrychtoŭcy palicyi da biesparadkaŭ.

Mahčymaści prezidenta supakoić niezadavolenych ciapier značna mienšyja, čym padčas pratestaŭ «žoŭtych kamizelek» u 2018—2019 hadach. Tady jon pajšoŭ na sastupki koštam u miljardy jeŭra. Ciapier Francyja maje vialiki dziaržaŭny doŭh i adzin z najbujniejšych biudžetnych deficytaŭ u jeŭrazonie. Novyja vydatki abmiežavanyja stanam finansaŭ, a pravodzić rašeńni praz raskołaty parłamient składana.

Takim čynam, Makron apynuŭsia pamiž supraćlehłymi patrabavańniami: inviestary čakajuć strymlivańnia dziaržaŭnych vydatkaŭ, a pratestoŭcy — bolšaj padtrymki. Biesparadki dadatkova napałochali finansavyja rynki, dla jakich palityčnaja niestabilnaść aznačaje bolšuju ryzyku.

Byłyja sajuźniki Makrona źviazvajuć ciapierašni tupik ź jaho rašeńniem raspuścić parłamient i pravieści daterminovyja vybary ŭ 2024 hodzie. Jany asłabili prezidenta i nie dali krainie ŭstojlivaj parłamienckaj bolšaści.

«Kaniec hetaha terminu — pavolnaja ahonija», — napisaŭ u X były deputat z łahiera Makrona Łaik Kiervran. Jon zajaviŭ, što prezident paralizavaŭ krainu svaim «absurdnym rašeńniem» raspuścić parłamient.

Eks-premjer Eduar Filip, jaki rychtujecca da ŭłasnaha ŭdziełu ŭ prezidenckich vybarach, taksama raskrytykavaŭ Makrona. Paśla jaho zvarotu jon napisaŭ, što, jak i miljony francuzaŭ, chacieŭ by pačuć rašeńni i ŭbačyć inicyjatyvy dla adnaŭleńnia paradku.

Na hetym fonie palityčnuju vyhadu moža atrymać lidarka ŭltrapravaha «Nacyjanalnaha abjadnańnia» Maryn Lo Pen. Jak adznačaje Reuters, jana moža pryciahnuć i ludziej, niezadavolenych padzieńniem uzroŭniu žyćcia, i tych, kaho napałochali rabavańni dy padpały. U svaim videazvarocie ŭ niadzielu Lo Pen pakazała ŭładu Makrona jak tuju, što razvalvajecca, a siabie — jak palityka, zdolnaha adnavić paradak.

«Lo Pen bolš nie treba tracić hrošy na pieradvybarčuju kampaniju. Pierad joj nie prosta volny šlach — heta šaścipałosnaja aŭtastrada», — skazaŭ Reuters jašče adzin były deputat z łahiera Makrona Žan-Batyst Maro.

Pavodle apytańniaŭ, na jakija spasyłajecca ahienctva, Lo Pen užo lidziruje ŭ prezidenckaj honcy 2027 hoda. Za vychad u druhi tur zmahajucca, siarod inšych, Filip i lidar radykalnych levych Žan-Luk Miełanšon. Apošnija apytańni pakazvajuć, što Miełanšon krychu apiaredžvaje Filipa, a jaho vychad u druhi tur byŭ by vielmi spryjalnym dla Lo Pien.

Niahledziačy na zakliki apanientaŭ zastacca ŭ Francyi, u paniadziełak Makron prybyŭ u Kuviejt u miežach pajezdki pa krainach Piersidskaha zaliva. Jon tłumačyć, što vizit dapamoža zabiaśpiečyć pastaŭki paliva i asłabić ekanamičnyja ciažkaści, jakija padšturchoŭvajuć ludziej da pratestaŭ. Ale, adznačaje Reuters, pajezdka moža ŭzmacnić uražańnie, što prezident nie adčuvaje nastrojaŭ u krainie.

Maro raskazaŭ ahienctvu, što padčas razmovy z Makronam u niadzielu zaklikaŭ jaho padrychtavać arhanizavany daterminovy sychod. Na dumku eks-deputata, heta dazvoliła b vyjści z palityčnaha tupika zamiest taho, kab pravieści jašče paŭhoda bieź jasnaha kirunku.

«Jon nie choča zdavacca, heta nie ŭ jaho charaktary. Ale mienavita heta jon pavinien zrabić dziela krainy», — skazaŭ Maro.

• 7
• 0
• 1
• 3
• 1
• 2
• 0
• 0