U Hiermanii zatrymali 53‑hadovaha hramadzianina Ukrainy Vadzima Ja., jakoha padazrajuć u špijanažy na karyść rasijskaj raźviedki. Pra heta paviedamiła Fiederalnaja prakuratura Hiermanii. Zatrymańnie adbyłosia ŭ rajonie Oder-Špreje ŭ fiederalnaj ziamli Brandenburh.
Pavodle viersii śledstva, nie paźniej za lipień 2025 hoda padazravany praz pasiarednika ŭstalavaŭ kantakt z rasijskaj raźviedkaj. Na fonie vajny Rasii suprać Ukrainy jon nibyta źbiraŭ u Hiermanii infarmacyju vajskovaha značeńnia dla pieradačy rasijskamu boku.
Śledstva śćviardžaje, što jaho cikavili źviestki pra vytvorčaść braniatechniki, bojeprypasaŭ i vybuchovych rečyvaŭ, a taksama pra vajskoŭcaŭ i vajskovyja abjekty, źviazanyja z harantavańniem biaśpieki ŭschodniaha fłanhu NATA. Častka hetaj infarmacyi była ŭ adkrytym dostupie. Adnak, pavodle abvinavačańnia, padazravany taksama metanakiravana źbiraŭ źviestki ŭ pradstaŭnikoŭ jeŭrapiejskaj abaronnaj pramysłovaści.
Jak paviedamlaje niamieckaje vydańnie Der Spiegel, Vadzim Ja. žyŭ u Ajzienchiutenštacie i pachodzić z Łuhanskaj vobłaści Ukrainy. Siarod inšaha, jon nibyta cikaviŭsia 45‑j tankavaj bryhadaj bundeśviera, viadomaj jak «litoŭskaja bryhada». Hetaje złučeńnie, jakoje naličvaje kala 5000 vajskoŭcaŭ, Hiermanija płanuje całkam razharnuć u Litvie da 2027 hoda.
Pavodle krynic vydańnia ŭ śfiery biaśpieki, u apošnija hady fiksavalisia sproby naładzić kantakty z vajskoŭcami, pryznačanymi dla słužby na ŭschodnim fłanhu NATA. Akramia taho, kala abjektaŭ u Litvie, padrychtavanych dla raźmiaščeńnia padraździaleńniaŭ bundeśviera, nieadnarazova zaŭvažali padazronyja bieśpiłotniki.
23 kastryčnika zatrymanaha pavinny dastavić da śledčaha sudździ Fiederalnaha suda Hiermanii ŭ Karłsrue. Sudździa vyrašyć, ci pakidać jaho pad vartaj na čas rasśledavańnia.
U Fiederalnaj prakuratury paviedamili, što rasśledavańnie pačałosia paśla taho, jak materyjały pieradała Fiederalnaja słužba achovy kanstytucyi Hiermanii. Śledčyja dziejańni daručanyja Fiederalnamu viedamstvu kryminalnych spraŭ. Padazreńni pakul nie aznačajuć, što vina zatrymanaha dakazanaja.
Ciapier čytajuć
Trahiedyja z 30‑hadovaj doktarkaj sa Starobina — pajšła vydalać zub mudraści i pamierła20
Kamientary