Polski biznes nie śpiašajecca ŭ Biełaruś

Supolnaje biełaruska-polskaje pradpryjemstva pa budaŭnictvie Zelvienskaj vuhalnaj elektrastancyi moža być stvorana ŭžo ŭ hetym miesiacy. Košt prajektu aceńvajecca ŭ 2 miljardy dalaraŭ. Jakija jašče ekanamičnyja intaresy majuć palaki na terytoryi Biełarusi?

Pra kapitał krain-susiedak, układzieny ŭ Biełaruś, «NN» pačała pisać u № 22 za 16 červienia. Tady ŭvaha była skancentravana na litoŭcach. Ciapier pryjšoŭ čas polskaha biznesu. Kapitał samaha zamožnaha palaka Jana Kulčyka, układzieny ŭ telekamunikacyi, nieruchomaść i enierhietyku, aceńvajecca ŭ $4,5 miljardaŭ. I jon nie adziny miljarder u krainie. Litoŭcy takich bahaciejaŭ nie mieli nikoli. Tym nie mienš, u Biełarusi prybałty inviestujuć našmat bolš.

Miljardery hrajuć pa-bujnamu

Toj samy Kulčyk i źbirajecca budavać Zelvienskuju elektrastancyju. Polskaja inviestycyjnaja kampanija Kulczyk Investments, jakaja naležyć jamu, užo abhavaryła ź biełaruskim «Biełenierha» pytańni, datyčnyja budaŭnictva, a taksama taryfnaj i ekspartnaj palityki pradpryjemstva.

Ideja supracoŭnicva ŭpieršyniu była ahučanaja jašče dva hady tamu padčas inviestycyjnaha foruma ŭ Łondanie, dzie, darečy, i žavie bahaty palak. Z taho času Jan Kulčyk — adzin ź lubimych kampańjonaŭ biełaruskaha ŭrada. Niezdarma mienavita jaho kampanija atrymała paśviedčańnie № 1 inviestycyjnaha ahienta ŭrada Biełarusi.

Ź idej Kulčyka, źviazanych z našaj krainaj, možna ŭzhadać takuju ž, jak u Zelvie, vuhalnuju stancyju ŭ Lelčycach. Pryhladaŭsia miljarder i da «Biełarusbanka». Praŭda, nivodny z prajektaŭ pakul tak i nie realizavany.

Kulčyk pracuje nie tolki ŭ našaj krainie, ale i ŭ susiednich. Polski aliharch choča vykupić hazanaftavyja i enierhietyčnyja pradpryjemstvy Ukrainy.

Jašče adzin miljarder, Lešek Čarniecki vałodaje «Sombiełbankam». U pačatku 2008 hoda chołdynh Getin Holding polskaha bahacieja nabyŭ 75,04% akcyj banka. Za ich Čarniecki zapłaciŭ amal $6 miljonaŭ.

Brest — polskaja meblevaja stalica

Kali centram litoŭskich inviestycyj źjaŭlajecca Lida, to polskija hrošy pieradusim ciakuć u Brest. Bolšaść nievialikich supolnych pradpryjemstvaŭ skancentravanyja ŭ tutejšaj svabodnaj ekanamičnaj zonie. Dla paraŭnańnia, z 560 sumiesnych albo vyklučna polskich pradpryjemstvaŭ, zarehistravanych u Biełarusi na dolu Brestčyny prychodzicca amal pałova — 43%. Niavyznačany status svabodnych ekanamičnych zon u novastvoranym Mytnym sajuzie dadaje tryvohi polskim biznesoŭcam. Ilhoty — hałoŭnaje, što pryviało ich u Biełaruś.

«Biełdreŭ», «Miebieluks-Briest», «Jeŭraforest», «Błek Red Uajt», «Anreks», «Mebla-Nioman»…. — voś niekalki z mnostva sumiesnych kampanij, jakija śpiecyjalizujucca na prodažy draŭniny ci mebli.

Ź pierśpiektyŭ miždziaržaŭnaha supracoŭnictva vyłučajecca prajekt polskaj hrupy Atlas. Jana ŭžo kupiła aktyvy hrodzienskaj kampanii «Tajfun» — vytvorcy klejaŭ, tynkoŭki i sistem aciapleńnia. Košt uhody aceńvaŭsia ŭ $4 miljona. Ciapier palaki z Łodzi hatovyja adkryć jašče adnu vytvorčaść na terytoryi Biełarusi — novy zavod pa vyrabie štučnaha hipsu. Jon, u svaju čarhu, budzie kaštavać kala 200 miljonaŭ jeŭra.

Polskaja Afryka

Adno z ekzatyčnych miescaŭ Kobrynščyny — straŭsavaja fierma la rajcentra. Sumiesnaje biełaruska-polskaje pradpryjemstva «PM i Kampanija», stvoranaje ŭ 2002 hodzie, zajmajecca raźviadzieńniem afrykanskich žyviołaŭ. Na terytoryi 350 hiektaraŭ žyvie kala 500 straŭsaŭ.

Miasam, tolki ŭ bolš tradycyjnaj formie, zajmajucca palaki ŭ Maładziečna. Miascovy miasakambinat «Mroz» nazvany ŭ honar ułaśnika, polskaha biznesoŭcy Vojciecha Mroza.

Uvohule, miasa, razam z meblaj, druhi asnoŭny pryjarytet palakaŭ u Biełarusi. Samy viadomy brend — brescki «Inkafud», stvorany jašče ŭ 2001 hodzie. Tady zachodniki pabudavali zavod z nula. Na terytoryju ciapierašniaha kambinata navat nie byli praviedzieny kamunikacyi.

Kandytarskimi vyrabami zajmajecca «Pieršaja šakaładnaja kampanija». Tyja, chto ničoha nie čuŭ pra nazvu kampanii, chacia b čuŭ pra brend šakałada «Ideał», jaki vyrablajecca pradpryjemstvam.

Vidavočna, što z uviadzieńniem biaźvizavaha režyma z Polščaj i Litvoj kolkaść drobnych pradpryjemstvaŭ z udziełam zamiežnaha kapitału pavialičycca. A voś bujny biznes usio jašče hladzić na Biełaruś z peŭnaj naściarohaj. Całkam imavierna, što šmatmiljardnyja inviestycyjnyja prajekty Jana Kulčyka, u vypadku ich paśpiachovaj realizacyi, adkryjuć darohu bujnym inviestaram.

Inviestycyi Polščy ŭ Biełaruś, $ młn

2009 22

2008 22

2007 27

2006 61

Krynica: Biełstat

• 0
• 0
• 0
• 0
• 0
• 0
• 0
• 0