Biełaruś płanuje da 2015 hoda skaracić dolu impartnaha piva na ŭnutranym rynku da 5 pracentaŭ, paviedamiŭ siońnia na pasiadžeńni Prezidyuma Saŭmina staršynia kancerna «Biełdziaržcharčpram» Ivan Dančanka.
Kiraŭnik «Biełdziaržcharčprama» rastłumačyŭ, što asnoŭnymi zadačami prahramy raźvićcia pivavarnaj haliny Biełarusi na nastupnuju piacihodku źjaŭlajucca asvajeńnie stvoranych mahutnaściej u halinie, naroščvańnie ekspartu, źnižeńnie impartu da 5 pracentaŭ ad abjomaŭ unutranaha rynku ź siońniašnich 30 pracentaŭ.
U jakaści adnoj ź mier, jakaja dapamoža źnizić impart piva, Ivan Dančanka prapanavaŭ uviadzieńnie licenzavańnia piva z Ukrainy. Jon nahadaŭ, što biełaruski bok pravioŭ antydempinhavaje rasśledavańnie adnosna ŭkrainskaha piva. «Ukrainski bok pryznaŭ, što jon dempinhavaŭ, kab antydempinhavaja pošlina ŭ pamiery kala 11 pracentaŭ nie ŭvodziłasia, — rastłumačyŭ jon. — Niekatoryja pivavarnyja kampanii Ukrainy ŭziali na siabie abmiežavańni ŭ cenavych adnosinach pa pastaŭkach piva ŭ Biełaruś».
Na dumku Ivana Dančanki, usio heta daje Biełarusi padstavy ŭvieści licenzavańnie impartu piva z Ukrainy. Adpaviedny narmatyŭny dakumient padrychtavany ŭžo. Pry hetym kiraŭnik «Biełdziaržcharčprama» nahadaŭ, što ŭ Kazachstanie ŭžo dziejničaje miechanizm licenzavańnia impartu piva. «My prosim padtrymać našy prapanovy pa hetamu napramku», — skazaŭ jon.
Ivan Dančanka taksama prapanavaŭ dla vyraŭnoŭvańnia bałansu ŭvozu i vyvazu piva z Rasii ŭklučyć tavarnuju pazicyju piva ŭ bałans Sajuznaj dziaržavy. «U ramkach Sajuznaj dziaržavy my z Rasijaj pastajanna robim prahnoznyja bałansy pa cukru, miasu, jajkach, małaku. Jość prapanova ŭvieści takija miery adnosna piva. Heta dało b nam mahčymaść rehulavać impart piva z Rasii», — adznačyŭ kiraŭnik «Biełdziaržcharčprama».
Akramia hetaha, dla impartazamiaščeńnia piva ajčynnyja vytvorcy płanujuć u bližejšy čas dadatkova asvoić vytvorčaść novych nazvaŭ hetaj pradukcyi. Tak, AAT «Bresckaje piva» płanuje vypuskać «Abałoń śvietłaje», AAT «Krynica» — «Otynhier», kampanija «Chajniekien» — «Złaty bazant čornaje».
Čamu Cichanoŭskaja nie pajechała na pachavańnie Papy?23
Kamientary