Śledčyja KDB, jakija viaduć spravu aryštavanaj śledčaj hieneralnaj prakuratury Śviatłany Bajkovaj, padpisali pastanovu ab padaŭžeńni raśśledavańnia.
24 žniŭnia śledztva pa spravie Śviatłany Bajkovaj praciahnutaje jašče na 2 miesiacy. Takoje mierkavańnie vykazaŭ advakat Michaił Voŭčak.
"Vidać pa ŭsim, vystavili joj "pradlonku" jašče na 2 miesiacy. Jak minułym razam niedzie ŭ 16 hadzinaŭ pakazali pastanovu". Advakat Michaił Voŭčak vykazaŭ niezadavalnieńnie tym, što jamu, jak jon kaža, jak zvyčajna, svoječasova nie paviedamlajuć pra toje, što adbyvajecca sa Śviatłanaj Bajkovaj.
Śledčuju pa asabliva važnych spravach Hieneralnaj prakuratury Śviatłanu Bajkovu aryštavali ŭ lutym i z taho času trymajuć u śledčaj turmie "amerykanka". Bajkovu abvinavačvajuć u pieravyšeńni ŭłady i niezakonnym vyzvaleńni ad kryminalnaj adkaznaści. Nibyta śledčaja zrabiła hetyja złačynstvy, kali raśśledavała spravy mytnikaŭ, ź jakimi byli ciesna źviazanyja supracoŭniki KDB dy inšyja vysokapastaŭlenyja asoby. Vinavataj siabie Śviatłana Bajkova nie pryznaje. Kab damahčysia vyzvaleńnia, śledčaja ciaham amal 10 dzion trymała haładoŭku i pisała da Alaksandra Łukašenki list, u jakim zhadvała pra svaje dziaržaŭnyja ŭznaharody i zasłuhi ŭ baraćbie z karupcyjaj. Adnak miera ŭtrymańnia dla Bajkovaj nie była źmienienaja, a spravu suproć jaje nie spynili. Dniami źjavilisia źviestki, što Śviatłanie Bajkovaj nibyta vystavili abvinavačvańnie ŭ atrymańni chabaru. Pra heta nibyta daŭ pakazańni baznesoŭca Małočka, jaki supracoŭničaŭ sa śledztvam pa spravie mytnikaŭ, jakoje viała Śviatłana Bajkova, i nia byŭ pryciahnuty da kryminalnaj adkaznaści.
Advakat Michaił Voŭčak, adnak, dadzienyja pra vystaŭleńnia abvinavačańnia ŭ atrymańni chabaru nie paćviardžaje.
"Padčas majho udziełu ŭ śledčych dziejańniach joj nie vystaŭlalisia abvinavačańni ab karupcyi", — kaža Michaił Voŭčak. Varta adnak zaznačyć, što paśla 9 žniŭnia Michaił Voŭčak z Bajkovaj nia bačyŭsia. "Kaniešnie, za hety čas mahło niešta i źmianicca, ale biez udziełu advakata vystaŭlać abvinavačańnie nia musiać. Mianie ž pra heta nichto nie infarmavaŭ", — skazaŭ "Svabodzie" advakat Voŭčak.
Spravu Śviatłany Bajkovaj naziralniki ličać pakazalnaj i tłumačać heta asablivaściami baraćby pamiž pravaachoŭnymi strukturami ŭ Biełarusi. Hetak, pavodle žurnalista Paŭła Šaramieta, asnoŭnaja baraćba viadziecca pamiž hrupoŭkaj daradcy prezydenta Viktara Łukašenki, u jakuju uvachodziać novyja kiraŭniki KDB dy Pamiežnaha kamitetu i "starymi" kadrami siarod siłavikoŭ z Hienprakuratury, Rady biaśpieki i MUS. Naziralniki sychodziacca ŭ mierkavańni, što baraćba pamiž imi viadziecca za tatalny kantrol nad siłavymi viedamstvami, a srodkami hetaj baraćby časta jość abvinavačvańni ŭ słužbovych złoŭžyvańniach ci ŭ karupcyi.
U KDB Biełarusi źviestki adnosna spravy Śviatłany Bajkovaj nie kamentujuć.
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach7
Kamientary