Za apošni kalandarny miesiac ratavalniki adłavili ŭ Minsku troch źmiej, paviedamiŭ pres-sakratar haradskoha ŭpraŭleńnia MNS Alaksandr Łapanik.
Tak, 5 žniŭnia kala žyłoha doma ŭ Minsku ratavalniki adłavili nievialikaha pitona, jaki ličycca niejadavitaj źmiajoj. A ŭžo 11 žniŭnia ŭ stalicy kala hałubiatni była adłoŭlena kalifarnijskaja karaleŭskaja źmiaja-albinos — taksama niejadavitaja.
Apošni vypadak zafiksavany 6 vieraśnia — staličnyja ratavalniki adłavili kobru na leśvicy mahazina pa vulicy Viery Charužaj. U MNS patelefanavali prachožyja, jakija zaŭvažyli źmiaju.
Pres-sakratar adznačyŭ, što va ŭsich vypadkach nie atrymałasia ŭstanavić uładalnikaŭ reptylij, a taksama jakim čynam źmiei trapili ŭ horad. Pavodle słoŭ Łapanika, usie źmiei byli pieradadzieny staličnamu zaaparku.
Pres-sakratar haradskoha ŭpraŭleńnia MNS taksama paviedamiŭ, što sioleta ŭ stalicy nie było vypadkaŭ adłovu dzikich žyvioł. Raniej u Minsku byŭ vypadak, kali na prajeznuju častku ŭ Malinaŭcy vyjšaŭ łoś. Łapanik taksama zhadaŭ situacyju, kali ź Minskaha zaaparka źbiehli hornyja kazły i zajšli na terytoryju adnoj sa stancyj MNS. Ratavalniki adłavili ŭciekačoŭ i viarnuli ŭ zaapark.
BiełaPAN
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
