Jak abkradajuć «Elektronnuju Biełaruś»

Hałoŭnym śledčym upraŭleńniem papiaredniaha rasśledavańnia MUS raspačata kala dziasiatka kryminalnych spravaŭ, u materyjałach jakich fihuruje dziaržaŭnaje pradpryjemstva «Instytut prykładnych prahramnych sistem». Pa dadzienych pravaachoŭnikaŭ,

pad dacham hetaj intelektualnaj ustanovy, jakaja ŭvachodzić u strukturu Ministerstva suviazi i infarmatyzacyi Biełarusi, doŭhi čas dziejničała złačynnaja hrupa.

Jak stała viadoma, niekalki dzion tamu čarhovym fihurantam hetaj kryminalnaj historyi staŭ były dyrektar instytuta. U dačynieńni da jaho raspačataja kryminalnaja sprava pa častcy 4 artykuła 210 Kryminalnaha kodeksa («Kradziež šlacham złoŭžyvańnia słužbovymi paŭnamoctvami ŭ asabliva bujnym pamiery»).

63-hadovy minčuk padazrajecca ŭ tym, što, źjaŭlajučysia kiraŭnikom navukova-daśledčaha pradpryjemstva, sumiesna sa svaim namieśnikam i zahadčykam adździeła skłaŭ i padpisaŭ fiktyŭnyja damovy padradu. Havorka idzie ab pieryjadzie z červienia 2002 pa śniežań 2004, kali Instytut prykładnych prahramnych sistem atrymaŭ zamovu na raspracoŭku prahramnaha zabiaśpiečańnia dla Fondu sacyjalnaj abarony nasielnictva Ministerstva pracy i sacyjalnaj abarony nasielnictva Biełarusi. Ułasnych sił dla vykanańnia takoha abjomu pracy nibyta nie chapiła, a tamu čynoŭniki padklučyli da spravy «mazhi» pryvatnaj firmy, jakaja, pavodle materyjałaŭ śledstva, palec na palec nie pakłaŭšy, atrymała na svoj raźlikovy rachunak amal 246 młn rubloŭ. A prahramnaje zabiaśpiečańnie sapraŭdy było raspracavanaje, ale, jak ličać śledčyja,

nad im pracavali štatnyja supracoŭniki instytuta, jakija navat nie padazravali, što vykonvajuć čužuju pracu.

Apieratyŭniki padazrajuć, što anałahičnuju ašukanskuju schiemu kradziažu hrošaj kiraŭniki instytuta ŭžyvali nie raz. Va ŭsich vypadkach zamova vykonvałasia dla Fondu sacyjalnaj abarony, tolki sumy byli roznyja i hrošy sychodzili na rachunki roznych padstaŭnych firmaŭ, čatyry dyrektary jakich siońnia znachodziacca pad śledstvam. Samo ž śledstva pačałosia ŭ kastryčniku 2009; na pačatak vieraśnia 2010 u materyjałach spravy zafiksavana piać epizodaŭ kradziažoŭ, jakija adnosiacca da pieryjadu 2002–2009, na ahulnuju sumu amal paŭmiljarda rubloŭ. Dvoje z šaści fihurantaŭ znachodziacca pad vartaj.

U kancy 2006 Kamitet dziaržkantrolu pravieryŭ chod vykanańnia Dziaržaŭnaj prahramy infarmatyzacyi Respubliki Biełaruś na 2003–2005 i na pierśpiektyvu da 2010 «Elektronnaja Biełaruś». Pravierka vyjaviła fakty nieefiektyŭnaha vykarystańnia biudžetnych srodkaŭ u sumie 640 miljonaŭ rubloŭ, naniesienuju škodu dziaržmajomaści ŭ pamiery 51 miljona rubloŭ i adsutnaść ekanamičnych abhruntavańniaŭ koštaŭ na navukova-daśledčyja i dośledna-kanstruktarskija (NDDKP) pracy ahulnym koštam 1 miljard 260 miljonaŭ rubloŭ. Žorstkaj krytycy dziaržkantrol padvierhnuŭ arhanizacyi-vykanaŭcy, u ich liku byŭ nazvany i Instytut prykładnych prahramnych sistem, dyrektara jakoha prapanoŭvałasia vyzvalić ad pasady.

U vysnovach KDK asabliva padkreślivałasia, što «najbolš značnaj ščylinaj dla niezakonnych vypłataŭ i marnatraŭstva srodkaŭ źjaŭlajecca vykanańnie NDDKP pa damovach padradu z časovymi navukovymi kalektyvami i fizičnymi asobami. Adsutnaść zakanadaŭčaha rehulavańnia apłaty pracy pa damovach padradu na vykanańnie NDDKP dazvalaje arhanizacyjam-vykanaŭcam advolna vyznačać pamiery ŭznaharodžańnia bieź niejkaha suvymiareńnia ich z ustalavanymi pamierami apłaty pracy ŭ hetych arhanizacyjach.

Kiraŭniki faktyčna prymali pracy, vykananyja imi samimi, a taksama ich svajakami i rabotnikami arhanizacyjaŭ, dla jakich raspracoŭvalisia prajekty,

Što datyčyć koštu, to, miarkujučy pa pramiežkavych vysnovach śledstva, padazravanyja tut nie prahadali. A voś nakont svajakoŭ KDK jak u vadu hladzieŭ: dvoje z najbolš aktyŭnych fihurantaŭ hetaj spravy — baćka i syn.

***

Instytut prykładnych prahramnych sistem zasnavany ŭ 1992 hodzie z metaj raspracoŭki prahramnaha zabiaśpiečańnia i infarmacyjnych technałohij dla arhanizacyj, ustanovaŭ i pradpryjemstvaŭ adukacyi, achovy zdaroŭja, kultury, orhanaŭ dziaržaŭnaha kiravańnia, siłavych struktur, fondaŭ i asobnych pradpryjemstvaŭ. Instytut składajecca ź piaci funkcyjanalnych adździełaŭ. Kolkaść pracaŭnikoŭ — 110 čałaviek.

• 0
• 0
• 0
• 0
• 0
• 0
• 0
• 0