U kastryčniku prezident Biełarusi naviedaje z aficyjnym vizitam Kitaj, u chodzie jakoha płanujecca zaklučyć šerah bujnych kantraktaŭ. Pra heta paviedamiŭ pieršy vice-premjer Uładzimir Siamaška 13 vieraśnia padčas sustrečy ŭ Minsku z namieśnikam staršyni pastajannaha kamiteta Usiekitajskaha schodu narodnych pradstaŭnikoŭ Czian Šušeniem.
«Urad Biełarusi ciapier prymaje šerah mier, kab padčas vizitu prezidenta ŭ KNR było padpisana pa krajniaj miery paŭtara dziasiatka kankretnych bujnych prajektaŭ», — udakładniŭ Siamaška.
U pres-słužbie prezidenta Biełarusi paviedamili, što vizit zapłanavany na pieršuju pałovu kastryčnika.
Pieršy vice-premjer taksama adznačyŭ, što za apošni čas u Kitai było stvorana niekalki SP z udziełam bujnych biełaruskich pradpryjemstvaŭ.
Tak, sioleta na terytoryi Kitaja było stvorana sumiesnaje pradpryjemstva, adnym z zasnavalnikaŭ jakoha vystupiŭ Minski zavod kołavych ciahačoŭ.
«Paŭhoda tamu stvaryŭ SP u Kitai «Homsielmaš», a dva tydni tamu było zarehistravana SP, adnym z zasnavalnikaŭ jakoha vystupiŭ Minski traktarny zavod», — paviedamiŭ Siamaška.
Akramia taho, viadziecca praca, jakaja budzie spryjać adkryćciu novych sumiesnych biełaruska-kitajskich pradpryjemstvaŭ na terytoryi Biełarusi. Urad viadzie pieramovy z uładami Kitaja ab stvareńni ŭ nas u krainie śpiecyjalnaj pramysłovaj zony dla kitajskich inviestaraŭ.
Pieršy vice-premjer taksama zajaviŭ, što kitajskija banki adkryli kredytnuju liniju na 15 młrd dołaraŭ dla realizacyi šerahu biełaruskich prajektaŭ.
Biełaruska-kitajskaje kredytnaje pahadnieńnie było padpisana ŭ kancy 2009 hoda. Kredytnaja linija adkryta na 15–20 hadoŭ z adterminoŭkaj pieršaha płaciažu na piać-šeść hadoŭ. Pry hetym častka kredytnaj linii — dziaržaŭnyja resursy, staŭka pa kredytach jakich składzie 2–3% hadavych. Jašče častka srodkaŭ budzie vydzielena ŭ vyhladzie kredytaŭ «Eksimbanka», pracentnaja staŭka ŭ hetym vypadku składzie 5–6%.
