Capraŭdnyja mužčyny dla mocnaha šlubu vodziacca:
1. U biblijatekach. Žančyny ličać, što siońnia ŭ biblijateki chodziać vydatnyja chłopcy. Jany, zrazumieła, razumnyja (tamu što viedajuć jak minimum darohu ŭ biblijateku), adkaznyja (niešta ž ich prymušaje hadzinami knižki hartać), metanakiravanyja (što šturchaje ludziej da viedaŭ, jak nie najaŭnaść dakładnaj mety?) i samotnyja (inakš što jany robiać viečarami ŭ biblijatecy?).
Adnym słovam, šaniec sustreć u chramie viedaŭ svoj los vielmi vialiki. Zastajecca tolki svoječasova skinuć stos knih prosta pad nohi abrancu losu i biezdapamožna ŭśmichnucca ŭ jaho razumny tvar.
2. U spartzałach. Kažuć, vydatnyja ekzemplary traplajucca, pryčym jak siarod tych, chto zajmajecca, tak i siarod trenieraŭ.
Siarod biassprečnych plusaŭ sportzalnych mužčyn — najaŭnaść chobi (nie budzie valacca na kanapie ź pivam), fizičnaja siła (spatrebicca ŭ haspadarcy), spakojnaje staŭleńnie da śpirtnoha (voś heta nie zaŭsiody, treba pravieryć dadatkova) i pryhožaje cieła (prosta pryjemna).
Ad žančyny patrabujecca nie zanadta zavichacca na snaradach, nie vyjaŭlać jakaściaŭ sapraŭdnaj amazonki, a troški zajmacca i biezdapamožna ŭśmichacca ŭ adkaz na pabłažlivyja ŭśmieški mužčyny.
3. Na treninhach. Uvažliva sačycie, kab treninhi byli pryśviečanyja vypracoŭcy pazityŭnych navykaŭ: raźvićciu liderskich jakaściaŭ, pavyšeńniu kiraŭnickich kampietencyj, usialakim finansavym zamaročkam.
Paźbiahajcie treninhaŭ kštałtu «Vychavańnie ŭpeŭnienaści ŭ sabie» (navošta vam hetyja zakampleksavanyja niaŭdačniki) i «Praca z debitorskaj zapazyčanaściu» (prablemnyja biźniesmieny nie samy lepšy varyjant).
Na treninhu nie saromiejciesia, ale i nie vyskokvajcie biez kanca z razumnymi adkazami — viedajcie mieru. Paśla zakančeńnia zaniatkaŭ paprasicie padvieźci vas — užo pozna, a vy stamilisia, i…
4. U hurtkach pa intaresach. Naprykład: chor, tancavalnaja studyja, samadziejny teatr, ipadrom, turystyčny kłub, usio, što vašaj dušy zaŭhodna. Heta naohuł samy lepšy varyjant.
Ahulnaść intaresaŭ, ramantyčnaja abstanoŭka, mahčymaść naładzić ciesny kantakt — prosta biezdań mahčymaściaŭ dla inicyjatyŭnaj dziaŭčyny.
Hałoŭnaje — nie naviazvacca. Akuratna vykarystoŭvajcie ŭvieś viadomy arsienał spakušeńnia, na vašym iłbie nie pavinna vyrazna pračytvacca «chaču zamuž», a to heta raspužaje ŭsich mužčyn. Lepš za ŭsio… nu, vy sami viedajecie.
