Akcyju pad takoj nazvaj 10 kastryčnika zładziać aktyvisty ŭkrainskaha Amnesty International.
10 kastryčnika — u Dzień suprać śmiarotnaha pakarańnia ŭ Žytomiry adbudziecca akcyja, pryśviečanaja situacyi ŭ Biełarusi. U hety dzień aktyvisty ŭkrainskaj Amnesty International zaklikajuć Alaksandra Łukašenku admianić śmiarotnaje pakarańnie. U arhanizacyi akcyi prymajuć udzieł biełarusy Ihar Koktyš, Arciom Dubski i Vital Ciščanka. U časie mierapryjemstva pakažuć tematyčnyja filmy, vystupiać muzyčnyja hurty. Asnoŭnaj dziejaj akcyi budzie zbor podpisaŭ pad pietycyjaj da ŭładaŭ Biełarusi z patrabavańniem uvieści maratoryj na śmiarotnaje pakarańnie ŭ Biełarusi. Akcyja pačniecca ab 11-j na vulicy Michajłaŭskaj.
Ukrainskaja Amnesty International pra situacyju ŭ Biełarusi:
* «Biełaruś — apošniaja z krainaŭ Jeŭropy i byłoha SSSR, dzie praciahvajuć karać śmierciu ludziej. Aficyjnych dadzienych ab kolkaści śmiarotnych prysudaŭ niama, adnak, pavodle acenak Amnesty International, z momantu zdabyćcia Biełaruśsiu niezaležnaści ŭ 1991 hodzie ŭ krainie, vierahodna, pakarali śmierciu nie mienš za 400 čałaviek. U 2010 hodzie pakarali śmierciu dvuch čałaviek, jašče dvum vyniesieny śmiarotny prysud.
* Pakarańnie śmierciu časta vystupaje nie tolki jak pakarańnie za złačynstvy, ale i jak pahroza dla padaŭleńnia palityčnaj aktyŭnaści.
* Isnujuć pierakanaŭčyja dokazy taho, što ŭ krainie ŭžyvajucca katavańni i inšyja formy žorstkaha abychodžańnia z metaj atrymańnia «pryznańniaŭ»; što asudžanych mohuć pazbavić paŭnavartasnaj mahčymaści abskardzić prysud; što asudžanyja i ich svajaki jašče vastrej usprymajuć žorstkaść, biesčałaviečnaha i prynižalnaha śmiarotnaha pakarańnia praz sakretnaść, što jaje akružaje.
* Prablemu prymianieńnia śmiarotnaha pakarańnia ŭ Biełarusi istotna ŭzmocniena šmatlikimi niedachopami sistemy kryminalnaha sudavodstva, u ramkach jakoj śmiarotnyja prysudy vynosiać i vykonvajuć nasupierak mižnarodnym normam i standartam pa hetamu vidu pakarańniaŭ».
***
Daviedka
Suśvietny dzień baraćby suprać śmiarotnaha pakarańnia adznačajecca z 10 kastryčnika 2003 h. Inicyjataram jaho stała Suśvietnaja kaalicyja suprać śmiarotnaha pakarańnia, jakaja abjadnoŭvaje bolš za 50 arhanizacyj, u tym liku Amnesty International, kalehii advakataŭ, prafsajuzy, a taksama dziaržaŭnyja orhany ŭłady na miascovym i rehijanalnym uzroŭniach, z metaj pakłaści kaniec prymianieńniu śmiarotnaha pakarańnia va ŭsim śviecie.
10 kastryčnika adznačajecca i Jeŭrapiejski dzień baraćby suprać śmiarotnaha pakarańnia, zaćvierdžany Radaj Jeŭropy ŭ 2007 h.
![Клас Клас](https://nashaniva.com/images/reactions/reaction-like.png)
![Панылы сорам Панылы сорам](https://nashaniva.com/images/reactions/reaction-facepalm.png)
![Ха-ха Ха-ха](https://nashaniva.com/images/reactions/reaction-smile.png)
![Ого Ого](https://nashaniva.com/images/reactions/reaction-omg.png)
![Сумна Сумна](https://nashaniva.com/images/reactions/reaction-sad.png)
![Абуральна Абуральна](https://nashaniva.com/images/reactions/reaction-anger.png)