«Z takimi palityčnymi sajuźnikami, jak Łukašenka, i vorahaŭ nie treba»

Staršynia rady pa zamiežnaj i abaronnaj palitycy Rasii Siarhiej Karahanaŭ zajaviŭ, što sajuz Rasii i Biełarusi — samaja vialikaja pamyłka rasijskaj palityki, za jakuju Rasija zapłaciła vielizarnyja hrošy.

— Sajuza nijakaha nikoli i nie było. Heta byli mytnyja prefierencyi ŭ abmien na subsidyi i adnosna svabodnaje pieramiaščeńnie hramadzian. Tamu ja nie baču nijakich admysłovych prablem, kali, viadoma, jakija-niebudź varjaty nie pačnuć stvarać pieraškody na šlachu pieramiaščeńnia ludziej.

Sajuz byŭ absalutnaj fikcyjaj, za jakuju davali mahčymaść schavacca baćku, a rasijskaja elita mahła prykryć svaju ahidnuju biaździejnaść u dačynieńni da Biełarusi ciaham apošnich 10–15 hadoŭ.

Ciapier navažylisia niešta pamianiać, zastajecca tolki spadziavacca, što hetaja sproba nie skončycca tym samym, što i ŭsie papiarednija prypadki razdražnieńnia. Pamiatajecie, u Maskvie ŭžo sprabavali adździalić much ad katlet, ale ničoha nie atrymałasia. Moža być, zaraz Rasija pačnie sistemna cisnuć, kab źnieści narešcie hetaha klijenta. Pytańnie zaklučajecca ŭ tym, jak padyduć da vyrašeńnia prablemy. Kali da hetaha pytańnia padyduć jak da biznesu, heta značyć «vycisnuć maksimalna» i adpuścić, to ŭsio vierniecca da raniejšaha stanu.

— Ale mnohija rasijskija palityki zaklikajuć siabravać z Łukašenkam i ŭsialak jaho abaraniajuć…

— Jość peŭnaja kolkaść palitykaŭ u Rasii, i hetaja kolkaść raście, jakija adkryta karumpavanyja Łukašenkam. Častka ź ich ideałahična blizkaja prezidentu Biełarusi, chtości adčuvaje nastalhiju. Toje, što Rasija tak doŭha tryvała takija abražalnyja pavodziny na takim stratehična važnym napramku, ja liču najbujniejšaj pamyłkaj rasijskaj palityki.

Łukašenka vyjaviŭsia našmat bolš chitrym i viortkim, čym možna było čakać. Jon surjozna vyras. Jon budzie zmahacca, bo sychodzić jamu niama kudy.

— Kali Łukašenka zakusić cuhli i advierniecca ad Rasii, nakolki chvaravitym heta budzie dla Rasii?

— Ničoha surjoznaha my nie stracim. Łukašenka nie zmoža naładzić adnosiny z Zachadam. U Rasii ź Jeŭropaj ciapier inšy viektar adnosin. Jaho pole dla manieŭru vielmi vuzkaje. Adnak jon zdoleŭ kansalidavać vakoł siabie častku rasijskaj elity.

— Ale časta pryvodziać arhumienty, što Biełaruś važnaja dla Rasii z vajennaha punktu hledžańnia, naprykład.

— Z vajenna-stratehičnaha punktu hledžańnia

Biełaruś nastolki ž važnaja, jak u savieckija časy Polšča, Čechasłavakija, Vienhryja, heta značyć nijak.

Viadoma, peŭnyja straty mohuć być. Treba budzie stvarać niekatoryja sistemy znoŭku, niejkija sistemy dublavać, ale my ŭžo vielmi mnohaje stracili, choć by praz toje, što majem nienadziejnyja šlachi tranzitu.

— Jak vy aceńvajecie pierśpiektyvy taho, što sychod Łukašenki pryviadzie pieraaryjentavańnia Biełarusi na Jeŭropu, i Rasija stracić palityčnaha sajuźnika?

— Z takimi palityčnymi sajuźnikami, jak Łukašenka, i vorahaŭ nie treba.

Nijakaja Biełaruś ni pry jakim prezidencie nie sydzie ŭ Jeŭropu. Nijakaj pieraaryjentacyi na Zachad adbycca nie moža ŭ siłu ekanamičnych, kulturnych i inšych asablivaściaŭ. U siarednieterminovaj pierśpiektyvie Rasija značna bolš jeŭrapiejskaja kraina, čym Biełaruś.

— Jak vy staviciesia da idei zapłacić Łukašenku lubuju canu za łajalnaść, tamu što Biełaruś nadzvyčaj važnaja dla Rasii?

— My ŭžo zapłacili vialikuju canu. Prosta treba razumieć, z kim vy handlujeciesia. Kalehi, jakija prapanoŭvali zapłacić jamu lubuju canu, prosta nie razumieli, što takim čynam jany ŭmacoŭvajuć mocnaha i žorstkaha lidara, jaki maje svaje ŭłasnyja intaresy i nie zdolny damaŭlacca.

Paradaksalna, ale navat Ukraina pry ŭsim jaje ŭnutranym biazładździ, tym nie mienš, bolš zdolnaja damaŭlacca, choć i nie nadoŭha, čym Biełaruś za Łukašenkam.

I ŭsie, chto ciapier pretendujuć na pasadu prezidenta ŭ Biełarusi, absalutna narmalnyja, umoŭna prarasijskija palityki, jakimi b apazicyjanierami jany ni byli. Łohika intaresaŭ budzie dyktavać nieabchodnaść zachoŭvać narmalnyja, ciesnyja, pracoŭnyja adnosiny z Rasijaj.

— 13 hadoŭ rasijska-biełaruskaj intehracyi — heta stračany čas abo ciažki šlach napierad?

— Heta absalutna stračany čas. Samaja vialikaja pamyłka rasijskaj zamiežnaj palityki. U pryncypie, my mahli stvaryć umovy dla taho, kab Biełaruś była pryjaznaj dziaržavaj i raźvivałasia pa blizkaj Rasii madeli. U hetym vypadku jana była b bolš nadziejnym sajuźnikam Rasii, čym ciapier.

• 0
• 0
• 0
• 0
• 0
• 0
• 0
• 0