«Kanhresić, kanhresić i jašče raz kanhresić»

U sietkavaj ciapier "Salidarnaści" Alaksandar Starykievič adhuknuŭsia na rašeńnie palityčnych supiernikaŭ režymu sumiaścić kampaniju miascovych vybaraŭ z padrychtoŭkaj druhoha Kanhresu demakratyčnych siłaŭ. Aŭtar artykułu pad krasamoŭnaj nazvaj "Kazka pra stračany čas" robić vysnovu, što "nastupnyja miesiacy lidery apazycyi pryśvieciać bieskampramisnaj baraćbie za pieradzieł tytułaŭ".

Ja vyrašyŭ pašyryć palitru mierkavańniaŭ i źviarnuŭsia pa kamentar na hetuju temu da dvuch palitolahaŭ.

Na dumku Valera Karbaleviča, stanoŭčym momantam možna ličyć toje, što źjaŭlajecca choć niejkaja matyvacyja. Nie sakret ža, što apanenty ŭłady choć i vyrašyli (za vyniatkam prychilnikaŭ Paźniaka) iści na vybary, ale staviacca da kampanii bolej čym skieptyčna. I navat jaje nazvu padkreślena biaruć u dvuchkośsie. Zaraz ža prapanujecca stymuł dla chadžeńnia u narod. Bo propusk na kanhres — trysta podpisaŭ za vyłučeńnie kandydytam u toj ci inšy Saviet.

Zrešty, Valer Karbalevič bačyć niebiaśpieku, što toj-sioj naźbiraje aŭtohrafaŭ "ad lichtara". Bo druhi varyjant, kab trapić na kanhres, — sabrać tyja ž trysta podpisaŭ pad adozvaj "Šlach da svabody".

Dadam, što navat kali podpisy buduć źbiracca sumlenna, to pytańnie ab reprezentacyjnaści takoha forumu ŭsio adno zastajecca. Cikava, a jak trapić tudy apazycyjny bamond, dla jakoha miascovyja vybary — nia toj uzrovień?.. Buduć kaaptavacca? Źbiaruć aŭtohrafy z dapamohaj valanteraŭ, jakich sami ž kličuć "indziejcami"? Ci nie pieratvorycca zaduma najpierš u spabornictva henych "indziejcaŭ"?

Palitolah Jury Čavusaŭ u razmovie sa mnoj zajaviŭ kateharyčna: sumiaščeńnie vybaraŭ z padrychtoŭkaj da kanhresu jość pamyłkaj. "Zaraz, — kaža Jury, — apazycyja znoŭ zajmajecca tym, što umieje najlepiej — vyśviatlać stasunki ŭ svaim asiaroddźzi. To bok — kanhresić, kanhresić i jašče raz kanhresić".

Darečy, daśviedčanyja ludzi kažuć, što taja jašče nia bačanaja publikaj adozva "Šlach da svabody" (ahulny palityčny mesydž apazycyjnych vyłučencaŭ na miascovyja vybary) patychaje sektanctvam. Maŭlaŭ, nie sprabujuć pašyrać elektarat, a znoŭ apelujuć da "svaich".

Karaciej, usio taja ž "skumbryja va ŭłasnym soku".

Zusim imavierna, što na čarhovym kanhresie zamiest Milinkieviča abiaruć novaha "pieršaha siarod roŭnych". Usim bačna, što były adziny kandydat i siońnia ŭžo nahadvaje anhlijskuju karalevu, jakaja caruje, ale nie kiruje. Ale biada ŭ tym, što pieradzieł partfelaŭ nia vyrašyć stratehičnych pytańniaŭ. Kanhres nie našmat zručniejšy dla vypracoŭki stratehii, čym jak mitynh na płoščy. Na takim forumie možna vyjhrać sieču za svajho partyjnaha lidera, ale niemahčyma vysiekčy iskry mocnych kanceptualnych idejaŭ.

Prostaje pytańnie: što siońnia prapanuje apazycyja masie suajčyńnikaŭ? Jakim lozunham (tolki nia treba cytavać miortvyja tezy z pratakołaŭ!) zdolnaja pryvabić pad svaje štandary apantanaha spažyvieckim bumam abyvatala? Dziela čaho toj stanie mianiać svaju maru pra nia nadta dabity "falksvahen" na vuličny pratest ź niepradkazalnymi nastupstvami?

Vyraznych adkazaŭ ad nivodnaha palityka pačuć nie daviałosia.

Naturalna, namacać i ažyćciavić mocnuju stratehiju ŭ našych umovach piakielna ciažka. Praściej, jak kaža iraničny palitolah, rabić toje, što najlepiej atrymlivajecca, — "kanhresić, kanhresić i jašče raz kanhresić".

P.S. Apošnim časam staŭ čaściej zazirać na sajt "Salidarnaści" (nahadaju: byłoha papiarovaha vydańnia, vycisnutaha represijami ŭ Sieciva). Resurs nabyŭ pryvabny dyzajn i stanovicca ŭsio cikaviejšy pavodle hramadzka-palityčnaha kantentu. Usio čaściej (mabyć, trochi razhrobšy arhanizacyjnyja kłopaty) vystupaje z artykułami i hałoŭny redaktar. Bolej stały čytač peŭna pamiataje peryjad u pieršaj pałovie 90-ch, kali artykuły Alaksandra Starykieviča, tady ŭłasnaha karespandenta "Iźviestij", rehularna stavili na vušy tahačasnaje vysokaje biełaruskaje načalstva. Ciapier vidno, što piaro nie zaržavieła!

• 0
• 0
• 0
• 0
• 0
• 0
• 0
• 0