Pucin pahražaje abmiežavać pastaŭki nafty ŭ Biełaruś

Na dumku daśledčykaŭ ź Instytutu pryvatyzacyi j menedžmentu, naftavyja sankcyi Rasiei macniej udaryli b pa dachodach biełaruskaha biudžetu, čym mahčymaje pavyšeńnie cenaŭ na haz. Taksama naftavy šok pryvioŭ by da bolšaha źnižeńnia vałavoha ŭnutranaha praduktu, čym hazavy.

U časie pramoj linii z hramadzianami Rasiei Uładzimier Pucin adkazaŭ na pytańnie datyčnaje Biełarusi.

Jaho zadaŭ branski pradprymalnik Michaił Safonaŭ: «Ci mahčyma stvaryć sajuznuju dziaržavu ź Biełaruśsiu».

Pucin skazaŭ: «Najpierš nam treba havaryć pra ekanamičnuju intehracyju. I ŭ suviazi z hetym samym hałoŭnym ja liču pierachod na adzinuju valutu. Heta b padšturchnuła raźvićcio supolnaha biznesu i ekanamičnych suviaziaŭ pamiž dźviuma krainami. U suviazi z hetym źviartaju ŭvahu na toje, što my nijak nie možam damahčysia supolnych standartaŭ u pytańni ekanamičnych mytaŭ, jak pa imparcie, hetak i pa eksparcie. Peŭnyja rečy nas chvalujuć. My bačym abjomy syroj nafty, jakija pastupajuć na biełaruskija naftapierapracoŭčyja zavody, bačym patreby samoj respubliki i toje, kolki naftapraduktaŭ pastaŭlajecca potym za miažu. Nam tutaka, viadoma ž, treba navodzić paradak u pracesie narmalnaha dyjalohu z našymi biełaruskimi kalehami. Kali nam nia ŭdasca dasiahnuć uhodaŭ, dyk nam pryjdziecca ŭvodzić niejkija abmiežavańni.

Kab pierajści da stvareńnia adzinaha parlamentu, treba ekanamičnaja baza. Nam niamožna stvaryć umovy, pry jakich my pastavim Rasieju ŭ sytuacyju procistajańnia niejkaha sajuznaha parlamentu i čysta rasiejskaha parlamentu, nadzialiŭšy ich prykładna adnolkavaj kampetencyjaj i skłaŭšy ŭmovy dla pieraciahvańnia kanatu».

Jak adznačali biełaruskija ekanamisty, reekspart naftapraduktaŭ staŭ u apošnija hady asnoŭnaj krynicaj dachodaŭ biełaruskaha biudžetu. Niderlandy i Brytanija, asnoŭnyja pakupniki biełaruskich salarki j benzinu, ad 2003-2005 hadoŭ raptoŭna stalisia hałoŭnymi handlovymi partnerami. Ekanamist Jarasłaŭ Ramančuk adznačaŭ u «Biełhazietie», što biełaruskija naftapradukty kuplajucca pieravažna filijami rasiejskich karparacyjaŭ, zarehistravanymi ŭ Niderlandach i Vialikaj Brytanii – krainach z vyhadnym padatkovym klimatam. Vykazvałasia i mierkavańnie, što heta mohuć być tyja samyja syravinnyja kampanii, jakija pastaŭlajuć naftu Biełaruś pa lhotnych taryfach.

Prezydent Biełarusi nia raz zajaŭlaŭ, što jon biare naftavy biznes u Biełarusi pad asabisty kantrol. Ekanamisty ź mižnarodnych arhanizacyj, jakija aceńvajuć prazrystaść biznesu adznačali, što atrymańnie j raźmierkavańnie prybytkaŭ ad handlu naftapraduktami ŭ Biełarusi słaba kantralujecca parlamentam i niedastupna hramadzkamu kantrolu.

Na dumku daśledčykaŭ ź Instytutu pryvatyzacyi j menedžmentu, naftavyja sankcyi Rasiei macniej udaryli b pa dachodach biełaruskaha biudžetu, čym mahčymaje pavyšeńnie cenaŭ na haz. Taksama naftavy šok pryvioŭ by da bolšaha źnižeńnia vałavoha ŭnutranaha praduktu, čym hazavy.

Mikoła Buhaj

□

Alaksandar Kłaskoŭski: Z mahčymaha kryzisu biełaruskaja ekanomika vyjdzie zdaraviejšaja

Voś jak kamentuje siońniašniuju zajavu Ŭładzimiera Pucina palitolah Alaksandar Kłaskoŭski na svaim błohu:

Siońnia Pucin znoŭ prapanavaŭ Biełarusi pierachodzić na adziny rubiel. Vyhladaje, adnak, na toje, što sam jon nia nadta vieryć, nibyta ŭ Miensku zhodziacca stajać z praciahnutaj rukoj pad dźviaryma rasiejskaha Centrabanku. Što vidno z sucelnaha ŭmoŭnaha ładu ŭ adpaviednaj frazie: "Heta b adhulała, biez anijakich sumnievaŭ, vielmi karysnuju i prahresiŭnuju rolu, padšturchnuła b raźvićcio sumiesnaha biznesu...".

Chutčej, haspadar Kramla apraŭdvajecca pierad svaim elektaratam za ŭzmacnieńnie ekanamičnaha cisku na "bratniuju Biełaruś". Padčas siońniašniaj naŭprostavaj linii jon adkrytym tekstam skazaŭ, što Rasieja moža skaracić pastaŭki nafty, kali Miensk nia budzie dzialicca mytam (voś vam i sakret Pališynela: čamu heta raptam znajšłosia šmat techničnych defektaŭ na trubie "Družby"!).

Tak što čakajma bajoŭ na naftahazavym froncie. A voś inkarparacyjnaha referendumu ŭ blizkaj perspektyvie čakać, badaj, nia varta. Zaŭvažcie: rasiejski prezydent tolki mimachodź zhadaŭ, što šerah palityčnych pytańniaŭ, u tym liku i datyčna Kanstytucyjnaha aktu, znachodzicca "ŭ pracesie ŭzhadnieńnia". To bok — zahruźli.

Z Pucinavych vykazvańniaŭ vynikaje, što realnaj ułady tak zvanym sajuznym orhanam Maskva davać nia choča. Maŭlaŭ, nielha paŭtarać sytuacyju kancu 80-ch — pačatku 90-ch, kali skłałasia "supraćstajańnie niejkaha sajuznaha parlamentu i čysta rasiejskaha parlamentu". Dekaratyŭnyja ž orhany — biez realnych vaharoŭ, biez mahčymaści hulać na palityčnym poli Kramla — sto hadoŭ patrebnyja biełaruskamu kiraŭniku.

Tak što zahruźli z henym aktam nadoŭha, kali nie nazaŭsiody.

Tamu i zajaŭlaje Pucin sapraŭdy "zusim ščyra i sumlenna", što ŭ dvuchbakovych dačynieńniach "pryjarytetam jość ekanomika". Maskva zbolšaha zrazumieła ŭžo, što dahnać biełaruski ciahnik prablematyčna. Pieravieści strełki na inkarparacyju naŭrad ci pašancuje. Zastajecca dziejničać pavodle pryncypu "Nie dahaniu, dyk sahrejusia!". Kreml vystaŭlaje Miensku suvory ekanamičny rachunak, kab spahnać hrošy za stratu intehracyjnych iluzijaŭ.

Niama licha biez dabra. Choć i pakrucić trochi našu ekanomiku, ale ž z hetaj kryzy jana maje šaniec vyjści zdaraviejšaj. I pakrysie ustalujucca narmalovyja ekanamičnyja stasunki dźviuch suverennych krainaŭ — prazrystyja, zrazumiełyja, biaz tłumu "bratniaj intehracyi".

Chacia niebiaśpieka zastajecca. Bo sapraŭdy ćviordym harantam niezaležnaści moža być tolki demakratyčnaja ŭłada. Uładu ž, adviazanuju ad hramadzkaha kantrolu, apanenty niepaźbiežna buduć padazravać, što jana ŭžo zakłała "kryštalnuju pasudzinu" ŭ rasiejski lambard.

Alaksandar Kłaskoŭski

• 0
• 0
• 0
• 0
• 0
• 0
• 0
• 0