Biełarusaŭ, źviazanych z apazicyjaj, zatrymali ŭ Žytomiry, treśli ŭ Kijevie

Ukrainskaja milicyja zatrymała ŭ Žytomiry čatyroch hramadzian Biełarusi pa padazreńni ŭ raspaŭsiudžvańni narkotykaŭ, paviedamlaje RIA Novosti.

Pavodle paviedamleńnia zatrymanyja źjaŭlajucca apazicyjnymi aktyvistami: rok-muzykant Ihar Koktyš, siamiejnaja para Taćciana i Vital Ciščanki i Arciom Dubski. Akramia taho, zatrymana žonka Koktyša, hramadzianka Ukrainy Iryna Ciuciuńnik.

3 listapada Ciuciuńnik pa telefonie źviazałasia z žurnalistami abłasnoj haziety «20 minut» i paviedamiła, što da ich u kvateru ŭvarvalisia supracoŭniki milicyi i rastłumačyli svoj vizit tym, što nibyta ŭ pamiaškańni jość čałaviek, jaki znachodzicca ŭ vyšuku. Adnak zamiest vyśviatleńnia asob ludziej, jakija byli ŭ kvatery, jany praviali vobysk i «padkinuli travu».

Na miesca vobysku vyjechali dźvie žurnalistki haziety z dyktafonam i fotaaparatam, jakija pačali fiksavać dziejańni milicyi, adnak milicyjaniery zabrali ŭ ich fotaaparat i dyktafon.

4 listapada na pres-kanfierencyi ŭ Kijevie dyrektar departamienta pa suviaziach z hramadskaściu MUS Ukrainy Dźmitryj Andrejeŭ zajaviŭ, što ŭ adnoj z kvater Žytomira rabotnikami adździeła pa baraćbie ź niezakonnym abarotam narkotykaŭ u Žytomirskaj vobłaści na zakonnych padstavach pravodziŭsia ahlad žylla. «Hetaje pracesualnaje dziejańnie było vynikam praciahłaj apieratyŭnaj raspracoŭki. My mieli infarmacyju, što ŭ hetaj kvatery zajmalisia niezakonnym raspaŭsiudžvańniem i ŭžyvańniem narkotykaŭ», — zajaviŭ Andrejeŭ.

Pavodle jaho słoŭ, u vyniku vobysku była kanfiskavana raślinnaja masa zialonaha koleru, jakaja vielmi nahadvaje kanopli masaj kala 10 h. Hramadzianie, jakija znachodzilisia ŭ kvatery, byli zatrymany.

Zatrymańnie ŭ Žytomiry Arcioma Dubskaha paćvierdziŭ Źmicier Daškievič. Jon adznačyŭ, što los zatrymanych pakul nieviadomy, Dubski na suviaź nie vychodzić.

U Biełarusi Koktyša abvinavacili ŭ zabojstvie — pavodle jahonych słovaŭ, paśla taho, jak jon pačaŭ vieści aktyŭnuju apazicyjnuju dziejnaść. Navat paśla apraŭdalnaha pryhavoru jon adsiedzieŭ bolš za dva z pałovaj hady ŭ Simfieropalskim SIZA, pakul nie vyjhraŭ spravu ŭ Jeŭrapiejskim sudzie pa pravach čałavieka.

Vitala Ciščanku sudzili za machlarstva. U jaho kvatery znachodzili narkotyki i zbroju — pavodle jahonych słovaŭ, paśla taho, jak jon udzielničaŭ u mitynhach pradprymalnikaŭ.

Arciom Dubski byŭ asudžany za ŭdzieł u akcyjach pratestu pradprymalnikaŭ, jakija prajšli ŭ studzieni 2008 hoda. Jon pravioŭ u Mahiloŭskaj papraŭčaj kałonii 10 miesiacaŭ.

Taksama ŭ Kijevie siońnia supracoŭniki ŭkrainskaj milicyi sprabavali ŭzłamać ŭvachodnyja dźviery biełaruskaha apazicyjaniera Alaksandra Cynkieviča — paviedamlaje «proUA».

Alaksandr Cynkievič skazaŭ pravaachoŭnikam, što źjaŭlajecca zamiežnym hramadzianinam i ŭ kvatery znachodziacca niepaŭnahadovyja dzieci. Jon hatovy razmaŭlać ź milicyjaj tolki ŭ prysutnaści konsuła Biełarusi. Adnak pravaachoŭniki nie byli zhodny na takija ŭmovy i vyklikali ślesara, kab adčynić dźviery.

Milicyjanty byccam by mieli infarmacyju, što apazicyjny žurnalist maje dačynieńnie da spravy vypusku ŭ Krymu falšyvaha vydańnia «Kamiersant» u siaredzinie kastryčnika hetaha hoda. Padrobleny numar haziety «Kamiersant» byŭ nakiravany na dyskredytacyju prem'jer-ministra Krymu, lidera miascovaj arhanizacyi Partyi rehijonaŭ Vasila Džarty.

Na momant padrychtoŭki hetaha materyjału nie było viadoma, čym skončylisia padziei vakoł Cynkieviča.

• 0
• 0
• 0
• 0
• 0
• 0
• 0
• 0