Za kožnuju dadatkovuju sekundu amerykanskaj prysutnaści ŭ Iraku padatkapłacielščyki ŭ ZŠA musiać zapłacić dadatkovyja 6300 dalaraŭ, a za kožny nastupny hod – kala 200 miljardaŭ dalaraŭ – piša amerykanski publicyst Nikałas D. Krystaf (Nicholas D. Kristof) na staronkach hazety International Herald Tribune.
U artykule «Chvilina ŭ Iraku kaštuje 380 tysiačaŭ dalaraŭ» Krystaf nahadvaje, što napiaredadni našeścia na Irak u sakaviku 2003 h. ministar abarony ZŠA Donald Ramsfełd aceńvaŭ, što ahulnyja vydatki na aperacyju nie pieravysiać 50 miljardaŭ dalaraŭ.
Praz try z pałovaj hady analizy specyjalistaŭ pakazvajuć, što rachunak za vajnu pieravysić biljon (tysiaču miljardaŭ), a moža navat i 2 biljony dalaraŭ. U druhim vypadku heta składzie 6300 dalaraŭ na kožnaha amerykanskaha mužčynu, žančynu i dzicio.
Pra toje, što vydatki na vajnu ŭ Iraku mohuć pieravysić navat 2 biljony dalaraŭ, kali ŭ rachunak uklučyć taksama i doŭhaterminovyja vydatki, naprykład, na medycynskuju dapamohu tysiačam paranienym žaŭnieraŭ ZŠA, pieraścierahaŭ u raparcie, apublikavanym na pačatku hoda, viadomy amerykanski ekanamist Džozef E. Styhlic (Joseph E. Stiglitz), nobeleŭski laŭreat.
Styhlic i jahonaja supracoŭnica Linda Biłmz (Linda Bilmes), specyjalist u hramadzkich finansach z Harvardzkaha ŭniversytetu, apublikavali ciapier aktualizavanuju versiju rapartu, u jakoj paćviardžajuć, što «vydatki na vajnu, razam ź biudžetnymi, sacyjalnymi i makraekanamičnymi vydatkami, peŭna, pieravysiać 2 biljony dalaraŭ».
Krystaf piša, što heta ŭ čatyry razy bolej, čym treba, kab zabiaśpiečyć na bližejšyja 10 hadoŭ medycynskaje strachavańnie dla 47 miljonaŭ amerykancaŭ, jakija ciapier jaho nia majuć. Albo ŭ 1600 razoŭ bolej, čym prezydent Buš pryznačyŭ na vynachodnictva vadarodnych elementaŭ, jakija musiać stać čystaj krynicaj enerhii ŭ mašynach, damach i fabrykach.
