За кожную дадатковую сэкунду амэрыканскай прысутнасьці ў Іраку падаткаплацельшчыкі ў ЗША мусяць заплаціць дадатковыя 6300 даляраў, а за кожны наступны год – каля 200 мільярдаў даляраў...
За кожную дадатковую сэкунду амэрыканскай прысутнасьці ў Іраку падаткаплацельшчыкі ў ЗША мусяць заплаціць дадатковыя 6300 даляраў, а за кожны наступны год – каля 200 мільярдаў даляраў – піша амэрыканскі публіцыст Нікалас Д. Крыстаф (Nicholas D. Kristof) на старонках газэты International Herald Tribune.
У артыкуле «Хвіліна ў Іраку каштуе 380 тысячаў даляраў» Крыстаф нагадвае, што напярэдадні нашэсьця на Ірак у сакавіку 2003 г. міністар абароны ЗША Дональд Рамсфэлд ацэньваў, што агульныя выдаткі на апэрацыю не перавысяць 50 мільярдаў даляраў.
Праз тры з паловай гады аналізы спэцыялістаў паказваюць, што рахунак за вайну перавысіць більён (тысячу мільярдаў), а можа нават і 2 більёны даляраў. У другім выпадку гэта складзе 6300 даляраў на кожнага амэрыканскага мужчыну, жанчыну і дзіцё.
Пра тое, што выдаткі на вайну ў Іраку могуць перавысіць нават 2 більёны даляраў, калі ў рахунак уключыць таксама і доўгатэрміновыя выдаткі, напрыклад, на мэдыцынскую дапамогу тысячам параненым жаўнераў ЗША, перасьцерагаў у рапарце, апублікаваным на пачатку года, вядомы амэрыканскі эканаміст Джозэф Э. Стыгліц (Joseph E. Stiglitz), нобэлеўскі ляўрэат.
Стыгліц і ягоная супрацоўніца Лінда Білмз (Linda Bilmes), спэцыяліст у грамадзкіх фінансах з Гарвардзкага ўнівэрсытэту, апублікавалі цяпер актуалізаваную вэрсію рапарту, у якой пацьвярджаюць, што «выдаткі на вайну, разам зь бюджэтнымі, сацыяльнымі і макраэканамічнымі выдаткамі, пэўна, перавысяць 2 більёны даляраў».
Крыстаф піша, што гэта ў чатыры разы болей, чым трэба, каб забясьпечыць на бліжэйшыя 10 гадоў мэдыцынскае страхаваньне для 47 мільёнаў амэрыканцаў, якія цяпер яго ня маюць. Альбо ў 1600 разоў болей, чым прэзыдэнт Буш прызначыў на вынаходніцтва вадародных элемэнтаў, якія мусяць стаць чыстай крыніцай энэргіі ў машынах, дамах і фабрыках.
Цяпер чытаюць
У Пскове расіянін забіў беларуса Валерыя за тое, што той патрабаваў паважаць беларускую нацыю6
Каментары