Kommiersant: Łukašenka admoviŭsia sustrakacca z Łaŭrovym, jaki pryjechaŭ da jaho z «apošnim papiaredžańniem»

Alaksandr Łukašenka admoviŭsia sustrakacca z kiraŭnikom MZS Rasii Siarhiejem Łaŭrovym, jaki prybyŭ u Minsk 22 listapada.

Aficyjnaja meta pryjezdu rasijskaha ministra — udzieł u supolnym pasiadžeńni kalehii ministerstvaŭ zamiežnych spraŭ dźviuch krain. Adnak ekśpierty ličać vizit Łaŭrova «apošnim papiaredžańniem Maskvy» biełaruskamu lideru, jaki «znachodzicca ŭ kuražy ad kantaktaŭ ź ES», piša infarmavanaja rasiejskaja hazieta «Kommiersant».

Asablivaje značeńnie vizitu kiraŭnika MZS RF nadaje toje, što jon adbyvajecca mienš čym za miesiac da prezidenckich vybaraŭ u Biełarusi.

Hazieta cytuje kiraŭnika pres-słužby biełaruskaha prezidenta Paŭła Lohkaha, jaki zajaviŭ, što «sustreča Alaksandra Łukašenki ź ministram zamiežnych spraŭ RF nie praduhledžana». Rašeńnie biełaruskaha lidera praihnaravać vizit kiraŭnika MZS RF vyhladaje demanstratyŭnym žestam, bo da hetaha času Łukašenka zaŭsiody sustrakaŭsia navat z rasijskimi hubiernatarami, kali jany prajazdžali praź Minsk.

Nie dapamahło i toje, što Siarhiej Łaŭroŭ jašče da pryjezdu ŭ Minsk abviaściŭ, što, u adroźnieńnie ad svaich zachodnich kalehaŭ, ź lidarami biełaruskaj apazicyi sustrakacca nie budzie.

A litaralna

za niekalki hadzin da pryjezdu Łaŭrova Łukašenka adkłaŭ padpisańnie dakumienta ab užyćci rehijanalnaj hrupoŭki vojskaŭ, u jakuju naminalna ŭvachodziać siły Biełarusi i zachodnich akruhaŭ Rasii.

«Viadoma ž, my budziem vykonvać svaje funkcyi, ale my ich zmožam vykonvać tolki pry padtrymcy RF, choć by uzbrajeńniem», — skazaŭ Łukašenka. «Heta nie padychod, — ličyć jon, — kali nam časam prapanoŭvajuć kuplać ŭzbrajeńnie za svoj košt, dy jašče, jak jany (Rasija) ŭmiejuć havaryć, pa rynkavych cenach». Pa słovach Łukašenki, Rasieja zacikaŭlenaja ŭ tym, kab biełaruskaja armija była ŭ paradku, tamu «treba dapamahać».

Pavodle jaho słoŭ, «rašeńnie ab prymianieńni rehijanalnaj hrupoŭki vojskaŭ — heta surjoznaje rašeńnie, i jano pavinna prymacca ŭ ramkach vyšejšaj dziaržrady» [heta značyć, na sustrečy ź Miadźviedzievym i Pucinym]. «Nijakija dakumienty ŭ pracoŭnym paradku ja padpisvać nie budu. Tak i pieradajcie ministru abarony i prezidentu Rasijskaj Fiederacyi», — zajaviŭ Łukašenka. Jon padkreśliŭ, što «jość VDR, voś jana źbiarecca, my razhledzim hety płan».

«Kommiersant» źviazvaje takuju liniju pavodzin Minska ŭ dačynieńni da Maskvy ź niadaŭnimi vizitami ŭ Biełaruś kiraŭnikoŭ MZS Hiermanii i Polščy Hida Viesterviele i Radasłava Sikorskaha, a taksama prezidenta Litvy Dali Hrybaŭskajcie.

Hazieta, adnak, papiaredžvaje, što takija pavodziny moža «vyjści bokam Łukašenku, jaki znachodzicca ŭ kuražy ad kantaktaŭ z pradstaŭnikami ES». Pavodle ich słovaŭ, vizit Siarhieja Łaŭrova — heta «apošniaje rasijskaje papiaredžańnie Minsku». Ekśpierty miarkujuć, što, kali Minsk praciahnie antyrasijskija eskapady, to ŭ novym hodzie sutykniecca z samaj sapraŭdnaj handlovaj vajnoj.

• 0
• 0
• 0
• 0
• 0
• 0
• 0
• 0