Ramančuk uzmacniŭ antybiurakratyčnuju temu, Ciareščanka daŭ novyja padstavy dla kpinaŭ

Znoŭ, jak i minułyja vystupy, Ramančuk uvieś svoj radyjozvarot pryśviaciŭ ekanamičnym i sacyjalnym pytańniam, znoŭ vystupaŭ całkam pa-rasiejsku.

Adroźnieńnie ad minułaha vystupu — mocnaja papulisckaja, antybiurakratyčnaja tema. Jarasłaŭ nieadnarazova ŭzhadvaŭ načalstva, biurakratyju. «Kamu ŭ Biełarusi žyć dobra — heta načalstvu», — kazaŭ Ramančuk. Pavodle jahonych słovaŭ, u ŽKH zarobki składajuć 2–3 tysiačy dalaraŭ. Ramančuk asabliva adznačyŭ nieabchodnaść skaračeńnia biurakrataŭ. «Navošta ŭtrymlivać hetych ideolahaŭ, navošta ŭtrymlivać kamitety pa cenach. Biaź ich naša žyćcio stanie lepš».

Uvohule, Ramančuk ad pačatku zajaviŭ, što pasprabuje adkazvać na try hałoŭnyja pytańni jakija chvalujuć ludziej — zarobki, ceny, dzie ŭziać hrošy. Ramančuk davoli časta spasyłaŭsia na svaje sustrečy ź ludźmi i na pytańni, jakija tam jamu zadavalisia.

Dzie nam uziać hrošy na reformy, na pryvatyzacyju? Tut jość čatyry aktyvy. Pieršaje: na rukach u pradprymalnikaŭ nazapasiłasia 4 miljardy dalaraŭ. Druhoje: zamiežnyja investycyi. Treciaja krynica — uklučeńnie ziamli ŭ paŭnacenny ekanamičny abarot. Čaćviortaja — skaračeńnia biurakrataŭ, vyzvaleńnie nacyjanalnaha pradprymalnictva, skaračeńnie padatkaŭ.

Biełaruskuju ekanomiku Ramančuk nazvaŭ ekanomikaj jamačnaha ramontu daroh. Zamiest taho, kab zrabić dobry ramont, našy darožniki, pavodle jaho, źmiešvajuć asfalt z brudam.

***

Viktar Ciareščanka znoŭ malavaŭ ekanamičny cud, jaki zdarycca ŭ vypadku jahonaha prychodu da ŭłady.

Abiacaŭ pavialičeńnie zarobkaŭ, pensijaŭ, dapamohaŭ na dziaciej, na invalidaŭ. Paabiacaŭ vyrašeńnie prablemy viartańnia savieckich ŭkładaŭ ciaham dvuch hadoŭ.

Jak i minuły raz, Ciareščanka havaryŭ pra zhubnaść aryjentacyi na dalar, pra niezaležnaść ad zamiežnaj valuty. Nia treba brać zamiežnyja kredyty, Biełaruś sama budzie davać kredyty inšym. Uviadziem novy rubiel, 100-pracentna zabiaśpiečany. Kurs rubla da dalaru budzie try da adnaho, za 5–7 hadoŭ vyjdziem adzin da adnaho da dalaru.

Mienavita z hetaha kpiać aficyjnyja ŚMI, havoračy pra toje, jak niejki nienazvany kandydat abiacaje rubiel da dalaru adzin da adnaho. Ale ciapier padstavaŭ dla ironii stanie jašče bolš, bo Ciareščanka paabiacaŭ, što na rubli budzie jahony partret jak harantyja stabilnaści hetaj valuty.

Ź cikavaha — toje, što Ciareščanka ŭ adnym momancie na niekalki chvilinaŭ pierajšoŭ na biełaruskuju movu.

Radyjo Svaboda (aŭdyjo)

• 0
• 0
• 0
• 0
• 0
• 0
• 0
• 0