Ukrainskich ekzit-polščykaŭ łavili na falsifikacyjach u samoj Ukrainie

Falsifikacyju ŭ 2009-m vyjaviŭ kandydat Cihipka.

Ekzit-poły na prezidenckich vybarach 19 śniežnia buduć pravodzić try arhanizacyi. Pavodle infarmacyi Centrvybarkama, kamisija pa praviadzieńni sacyjałahičnych daśledavańniaŭ pry Nacyjanalnaj akademii navuk vydała licenzii na hety vid ekspres-apytańniaŭ dvum biełaruskim strukturam i adnoj zamiežnaj. Apytvać vybarščykaŭ na vychadach z učastkaŭ buduć intervjujery analityčnaha centra «EkaoM», Respublikanskaha sajuza hramadskich abjadnańniaŭ «Biełaruski kamitet moładzievych arhanizacyjaŭ» i kampanii «TNS-Ukraina», paviedamlajuć «Biełaruskija naviny».

Pieršyja dźvie struktury ŭžo pravodzili padobnyja apytańni - na refierendumie 2004 hoda i na prezidenckich vybarach 2006 hoda. Tady vyniki ich ekzit-połaŭ faktyčna supali z aficyjnymi vynikami vybaraŭ, abvieščanymi Centrvybarkamam.

Kampanija ž «TNS-Ukraina» u Biełarusi pracuje ŭpieršyniu (jak i ŭpieršyniu da ekzit-połu dapuščanaja zamiežnaja kampanija). Adnak dośvied praviadzieńnia ekzit-połaŭ i ŭ cełym ŭdziełu ŭ bujnych palityčnych kampanijach va ŭkrainskich sacyjołahaŭ vialiki. U siabie va Ukrainie, a taksama ŭ inšych postsavieckich krainach i dziaržavach Uschodniaj Jeŭropy «TNS-Ukraina» ŭdzielničaŭ bolš čym u 20 elektaralnych kampanijach. Pieršy ekzit-poł kampanijaj byŭ praviedzieny jašče ŭ 1998 hodzie.

Praŭda, u takim pavažnym partfolia kampanii jość i ciomnaja staronka - na apošnich prezidenckich vybarach va Ukrainie kampaniju abvinavacili ŭ padtasoŭcy sacyjałahičnych dadzienych.

13 listapada 2009 hoda ŭ Padolski rajonny sud Kijeva, pa miescy rehistracyi kampanii «TNS Ukraina», byŭ padadzieny pazoŭ ad Siarhieja Cihipki, jaki datyčyŭsia pracaŭ, vykananych TAA «TNS Ukraina» ź nienaležnaj jakaściu. Havorka idzie pra zbor i apublikavańnie infarmacyi ŭ miežach daśledavańnia hramadskaj dumki datyčna pieradvybarčych simpatyjaŭ.

Falsifikacyja daśledavańniaŭ była vyjaŭlenaja ŭ vyniku niezaležnaj pravierki na terytoryi TAA «TNS Ukraina» niezaležnymi padradčykami.

U vyniku pravierki było vyjaŭlena, što biez małoha čverć respandentaŭ navat nie viedali, pra toje, što ŭdzielničali ŭ apytańni. Nazirałasia nieadpaviednaść kvotnym pryncypam, i amal 40% apytanych, pry praviadzieńni kantrolnaj pravierki, vykazvali mierkavańnie adroznaje ad zafiksavanaha.

Ahulnaja kolkaść intervju, da jakich mohuć być pradjaŭlenyja pretenzii chacia b pa troch vyšejpaznačanych parušeńniach, składaje 66% ad usiaho praviedzienaha daśledavańnia.

Jak paviedamiŭ kiraŭnik abiedźviuch strukturaŭ (SOCIS i «TNS Ukraina») doktar sacyjałahičnych navuk Mikałaj Čuryłaŭ, pravodzić ekzit-poł na vybarach prezidenta Biełarusi «TNS Ukraina» budzie pa zamovie aficyjnaha telekanała ANT.

Darečy, niahledziačy na toje, što prava ŭłasnaści na atrymanyja ŭ Biełarusi kampanijaj «TNS Ukraina» dadzienyja naležyć kanału ANT, Mikałaj Čuryłaŭ dazvoliŭ zajavić: «Pavodle našych apytańniaŭ, u Łukašenki siońnia pad 70% i jaho možna pavinšavać ź pieramohaj». Zrazumieła, čamu mienavita hetych «sacyjołahaŭ» akredytavali biełaruskija ŭłady.

• 0
• 0
• 0
• 0
• 0
• 0
• 0
• 0