Jak instruktujuć svaich naziralnikaŭ prałukašenkaŭskija arhanizacyi?
Prałukašenkaŭskija arhanizacyi vyłučyli bahata naziralnikaŭ na biahučyja vybary. Adnak naŭrad ci niechta budzie mieć iluzii, što hetyja naziralniki buduć sačyć za prazrystaściu vybaraŭ. Pryhadajcie prynamsi adzin vypadak, kab naziralnik ad BRSMu ci «Biełaj Rusi» vyjaviŭ jakoje parušeńnie ci znajšoŭ śviedčańnie falsifikacyj.
Niekalki dzion tamu mnie trapiŭ u ruki adzin cikavy dakumient, jaki byŭ dasłany ŭ Hłybocki rajonny kamitet BRSM. Heta «Mietadyčka naziralnika», jakaja źmiaščaje instrukcyju pa nazirańni za vybarami.
Taki ž dakumient nieabačliva byŭ apublikavanyna aficyjnym sajcie Niaśvižskaha rajvykankama.
Pieršy skaz u raździele «Ahulnyja patrabavańni» farmuluje hałoŭnuju zadaču naziralnika — «Pravieści prezidenckija vybary na vysokim arhanizacyjnym ŭzroni, nie dać siłam, zacikaŭlenym u destabilizacyi hramadstva, nivodnaj padstavy sarvać vybarčy praces abo nie pryznać vyniki hałasavańnia».
Jakija siły zacikaŭleny ŭ destabilizacyi hramadstva, aŭtary nie tłumačać. Adnak užo praź niekalki radkoŭ znachodzim paniaćcie «nabludatiel ot opponirujuŝich sił».
Naziralnikaŭ ad praŭładnych arhanizacyj instruktujuć być vielmi pilnymi da dziejnaści niezaležnych naziralnikaŭ. Padkreślivajecca, što naziralniki pavinny składać akty ab parušeńniach ź ich boku. Taksama jość ukazańnie fiksavać čas znachodžańnia na ŭčastku naziralnikaŭ «ot opponirujuŝich sił».
U vypadku źjaŭleńnia na ŭčastku mižnarodnaha naziralnika nieabchodna pieradać jamu piśmovuju zajavu z acenkaj vybarčaha pracesu. Aŭtary rekamiendujuć zahadzia rychtavać takija zajavy.
Najbolšuju častku dakumienta zajmaje razhlad «prablemnych situacyj», jakija mohuć uźniknuć na ŭčastku. Miarkujučy pa abjomu apisańnia, hałoŭnaj prablemaj źjaŭlajucca pytańni, jakija mohuć uźniknuć padčas dyjałohu z «opponirujuŝimi nabludatielami».
Aŭtary tłumačać, što patrebna adkazvać, kali «opponirujuŝij» kaleha kaža pra niezakonnaść vyłučeńnia Łukašenki na čaćviorty termin, prapanuje acanić demakratyčnaść vybarčaha zakanadaŭstva abo zhadvaje prapanovu Niaklajeva zabiaśpiečyć usie ŭčastki prazrystymi skryniami.
U toj ža čas naziralnikam rajać ustrymlivacca ad abmierkavańnia kankretnych temaŭ, bo «lubaja infarmacyja moža być vykarystana dla dyskredytacyi Vas asabista i vybarčaha pracesu ŭ cełym».
Padzieł pamiž «česnymi» i «niačesnymi» naziralnikami najbolš vidavočny ŭ šostym punkcie instrukcyi: «U vypadku składańnia naziralnikami ad apazicyi zvarotaŭ ab parušeńni zakanadaŭstva ab vybarach Vam nieabchodna razam z naziralnikami ad kanstruktyŭnych arhanizacyj skłaści zvarot ab tym, što nijakich parušeńniaŭ nie było vyjaŭlena».
U toj ža čas u dapamožniku niama anivodnaha skazu, jaki b tłumačyŭ paradak dziejańniaŭ u vypadku parušeńnia vybarčaha zakanadaŭstva siabrami kamisii.
Dadzienaja «mietadyčka naziralnika» jaskrava śviedčyć, što prałukašenkaŭskija arhanizacyi vyłučajuć svaich naziralnikaŭ nie dla realnaha nazirańnia za zakonnaściu vybaraŭ. Ułada vyznačyła rolu «česnym» naziralnikam u vybarčym pracesie — zajavić, što vybary byccam by prajšli pa ŭsich demakratyčnych standartach.
Kamientary