«Mižnarodnaja amnistyja» pryznała biełaruskich aryštantaŭ viaźniami sumleńnia

Pravaabarončaja arhanizacyja «Mižnarodnaja amnistyja» pryznała viaźniami sumleńnia 16 hramadzian Biełarusi, aryštavanych u miežach kryminalnaj spravy ab masavych biesparadkach u Minsku 19 śniežnia. Jak paviedamili ŭ «Mižnarodnaj amnistyi», viaźniami sumleńnia źjaŭlajucca piać kandydataŭ u prezidenty na vybarach-2010: Alaksiej Michalevič, Mikałaj Statkievič, Uładzimir Niaklajeŭ, Ryhor Kastusioŭ i Andrej Sańnikaŭ.

U śpis viaźniaŭ sumleńnia ŭklučany redaktar sajta charter97.org Natalla Radzina, karespandent rasijskaj «Novoj haziety» i žonka Sańnikava Iryna Chalip, redaktar haziety «Tovariŝ» davieranaja asoba Niaklajeva Siarhiej Vaźniak.

«Mižnarodnaja amnistyja» taksama abviaściła viaźniami sumleńnia davieranuju asobu Niaklajeva Alaksandra Fiadutu, kiraŭnika vybarčaha štaba Sańnikava Uładzimira Kobieca, davieranych asob Sańnikava Dźmitryja Bandarenku i Alaksandra Arastoviča, kiraŭnika vybarčaha štaba Statkieviča Siarhieja Marcaleva, davieranuju asobu eks-kandydata ŭ prezidenty Jarasłava Ramančuka Anatola Labiedźku, kiraŭnika vybarčaha štaba eks-kandydata ŭ prezidenty Vitala Rymašeŭskaha Paŭła Sieviarynca i namieśnika staršyni zarehistravanaj u Čechii mižnarodnaj maładziožnaj arhanizacyi «Małady front» Anastasiju Pałažanku.

Hetyja źniavolenyja «źjaŭlajucca viaźniami sumleńnia, jakim vystaŭleny sfabrykavanyja abvinavačańni vyklučna ŭ suviazi ź mirnym vykazvańniem ich palityčnych pohladaŭ», zajaviŭ namieśnik dyrektara prahram Jeŭropy i Siaredniaj Azii «Mižnarodnaj amnistyi» Džon Dołchuisien. «Jany pavinny być nieadkładna i biezumoŭna vyzvaleny, a ŭsie abvinavačańni ŭ dačynieńni da ich źniaty», — padkreśliŭ jon.

Pavodle mierkavańnia pradstaŭnika arhanizacyi, praśledavańnie ludziej, jakija ŭdzielničali ŭ mirnaj demanstracyi, i žorstkaje abychodžańnie ź imi «pakazvaje aburalnuju niepavahu da pravoŭ čałavieka z boku biełaruskich uład i zasłuhoŭvaje samaha rašučaha asudžeńnia mižnarodnaj supolnaściu».

«Mižnarodnaja amnistyja» nie znajšła nijakich śviedčańniaŭ taho, što jany prymianili siłu abo padbuchtorvali da nasilla pierad ci padčas demanstracyj», — zajaviŭ Dołchuisien.

Arhanizacyja adznačaje, što abvinavačańni ŭ dačynieńni da Rymašeŭskaha, adpuščanaha pad padpisku ab niavyjeździe 1 studzienia, zastajucca ŭ sile. «Mižnarodnaja amnistyja» praciahvaje sačyć za jaho spravaj, a taksama za spravami inšych abvinavačanych u suviazi z demanstracyjaj 19 śniežnia, siarod jakich, jak miarkujuć pravaabaroncy, «mohuć być novyja viaźni sumleńnia».

• 0
• 0
• 0
• 0
• 0
• 0
• 0
• 0