RNIE zaniałosia rusifikacyjaj lalek

Ruskaje nacyjanalnaje adzinstva (RNIE) – niezarehistravanaja ŭ Biełarusi neafašysckaja arhanizacyja, znoŭku nahadała pra siabie viciablanam.

Na hety raz svaje patrabavańni neafašysty dasłali ŭ haradzki lalečny teatar na imia zahadčycy litaraturna-dramatyčnaj častki Viktoryi Daškievič. U dosyć niahramatnym liście RNIE-šniki prapanujuć pierakłaści ŭsie pjesy repertuaru na rasiejskuju movu, bo ŭsio roŭna «Biełaruś u bližejšyja hod-dva ŭvojdzie ŭ skład Rasiei». Aŭtary škadujuć, što «zastalisia niekatoryja ŭstanovy kultury, dzie rasiejskaja mova mała vykarystoŭvajecca, i adnoj z hetkich ustanovaŭ jość biełaruski teatar «Lalka»».

U adroźnieńnie ad papiarednich listoŭ z pahrozami, jakija atrymali namieśnica staršyni abłasnoj arhanizacyi Abjadnanaj hramadzianskaj partyi (AHP) Alena Zaleskaja dy redakcyja niedziaržaŭnaj hazety «Viciebski kurjer M», hety davoli łahodny. U im navat hučyć prapanova vialikich hrošaj za pierakład pjesaŭ dy spektaklaŭ na rasiejskuju movu. Daškievič i artystaŭ teatru, pry vykanańni ŭmovaŭ, apalahiety šavinizmu hatovyja ŭklučyć u svaje šerahi. Pa słovach Daškievič, ź listu vynikaje, što ŭ varunkach chutkaha dałučeńnia da vialikaj Rasiei niama čaho kurčycca, a lepiej svaimi rukami nablizić hety čas, dapamahajučy RNIE, jakoje šmat zrabiła dziela źniščeńnia biełaruščyny.

Na papiarednich listach značyłasia adno abanenckaja skrynia – hety pryjšoŭ za podpisam viadomaha ŭ horadzie ruskamoŭnaha pradprymalnika-litaratara Vasila Brusa, jaki ŭ dadzieny momant znachodzicca ŭ Rasiei. U hetkaje aŭtarstva mała chto vieryć. Ale spasyłka na imia čałavieka moža dapamahčy vyjści na śled sapraŭdnych vykanaŭcaŭ, kali milicyja dy KDB, jakim pa zakonie treba zajmacca dziejnaściu padobnych ekstremisckich arhanizacyjaŭ, buduć mieć achvotu abciažaryć siabie hetkimi prablemami. U spravie papiarednich listoŭ, akramia adkazu, što ŭ Biełarusi niama hetkaj zarehistravanaj arhanizacyi RNIE, vorhany pakul ničoha nie zrabili. U pasłańni redaktaru «Viciebskaha kurjera M» Uładzimieru Bazanu neafašysty śćviardžali, što «majuć dobryja suviazi ŭ kalidorach ułady».

U Viciebsku RNIE dasyłała list jašče adnoj asobie – staršyni abłasnoj arhanizacyi Sajuza piśmieńnikaŭ Biełarusi (SPB) Tamary Krasnovaj-Husačenka. Ale tam, pa słovach śviedkaŭ, nie było pahrozaŭ – była ščyraja padziaka za toje, što aktyvistka praprezydenckaha SPB, jakaja rupliva adnosicca da rasiejskaj movy, paspryjała razvału nacyjanalistyčnaha Sajuzu biełaruskich piśmieńnikaŭ, jaki kaliści stvarali Kupała dy Kołas.

• 0
• 0
• 0
• 0
• 0
• 0
• 0
• 0