Cenzura: z vystavy «Pahoni» źniali šeść pracaŭ

U piatnicu ŭ Pałacy mastactva ŭ Minsku adkryłasia vystava supołki «Pahonia». Šeść prac ź jaje ekspazicyi byli źniaty napiaredadni ź ideałahičnych pryčyn.

Jak paviedamiŭ NN staršynia supołki mastak Alaksiej Maračkin, nie dazvolili vystaŭlać jaho dźvie karciny, try płakaty Uładzimira Krukoŭskaha i pałatno Viktara Mikity. Na piaci pracach prysutničaje nacyjanalnaja simvolika — bieł-čyrvona-bieły ściah albo hierb «Pahonia». A karcina Maračkina «Zdani (pieramožcy)» pryśviečana padziejam 19 śniežnia 2010 hoda.

Chto vystupiŭ u roli cenzaraŭ? «Kiraŭnictva Sajuza mastakoŭ», — adznačyŭ Alaksiej Maračkin.

Jon nie staŭ udakładniać proźviščy.

Vystava prymierkavana da 20-hodździa mastakoŭskaj supołki. Hety hurtok zapačatkavaŭ płyń u mastactvie, jakuju krytyki nazvali «histaryčnym ramantyzmam».

U majsterni ideołaha hetaje supolnaści, Jaŭhiena Kulika, što mieściłasia na hałoŭnym praśpiekcie Minska nasuprać KHB, u 1960-ja ŭtvaryŭsia niefarmalny nacyjanalny hurtok, što, pavodle miescaznachodžańnia, zvaŭsia «Na paddašku». Mastaki, jakija tam źbiralisia, byli adkrytyja novym pavievam u mastactvie. Adnačasova jany viartali ź niabytc daŭniejšyja žanry, naprykład, malavanyja dyvany, albo «sarmackija» partrety. U ekśpierymientach brali ŭdzieł Maračkin, Markaviec, Basałyhi, Kupava, Krukoŭski dy inšyja.

Hetak vynachodziłasia aryhinalnaja płastyčnaja mova. Źjavilisia jak adkryćci, partrety Łuckieviča, Dunina-Marcinkieviča, Vitaŭta, inšych histaryčnych piersanažaŭ. Hetyja tvory viedaje ciapier kožny biełarus. Dziakujučy siabram «Pahoni», u kulturu byli viernutyja imiony Jazepa Drazdoviča, Piotry Sierhijeviča, Aleny Kiš.

Adlik dziejnaści hetaj hrupy mastakoŭ možna vieści ad 1976 h., kali adbyłasia vystava da 100-hodździa z dnia naradžeńnia Ciotki.

Čynny ŭdzieł u dziejnaści supołki ad pačatku brali Jaŭhien Kulik, Viktar Markaviec, Mikoła Kupava, Uładzimir Krukoŭski, Hieorhi Skrypničenka, Hienadź Drazdoŭ, Uładzimir Sułkoŭski, Jury Piskun, Aleś Šaternik.

Tvorcy «Pahoni» stvaryli tyja vobrazy biełarusaŭ i Biełarusi, pa jakich my paznajom siabie.

U siońniašniaj ekspazicyi zapłanavanaja demanstracyja tvoraŭ 60 mastakoŭ roznaha ŭzrostu i roznych tvorčych manieraŭ. Siarod inšych takija słavutyja majstry, jak Alaksiej Maračkin, Viktar Markaviec, Hieorhi Skrypničenka. Siužety tvoraŭ nie tolki histaryčnyja, mnohija adlustroŭvajuć padziei sučasnaści.

Jak zaŭždy ŭ «Pahoni», vystava prymierkavanaja da Dnia Voli, i budzie dastupnaja dla prahladu da kanca miesiaca. Pabačym. Treba pabačyć.

• 0
• 0
• 0
• 0
• 0
• 0
• 0
• 0