Paciarpiełyja — žančyna i dvoje mužčyn — z šmatlikimi traŭmami dastaŭlenyja ŭ lakarniu. U žančyny amputavanyja dźvie nahi.
Zdareńnie adbyłasia na pierahonie pamiž stancyjami «Baranavičy—Paleskija» i «Baranavičy—Centralnyja» 13 sakavika ŭ 22.20.
Jak paviedamiła staršy inśpiektar hrupy infarmacyjnaha zabieśpiačeńnia Baranavickaha adździeła ŭnutranych spraŭ na transparcie Halina Paźniak, usie paciarpiełyja — 40-hadovaja žycharka v. Arabaŭščyna i dvoje haradžan, 24 i 29 hadoŭ, — byli niećviarozyja.
«Žančyna spatyknułasia i zvaliłasia. Spadarožniki sprabavali dapamahčy joj padniacca, ale, mabyć, heta im nie ŭdałosia. Mužčyny stali ciahnuć žančynu, i ŭsia trojca trapiła pad ciahnik», — raspaviała Halina Paźniak.
Paciarpiełyja špitalizavanyja. U mužčyn miedyki kanstatavali čerapna-mazhavyja traŭmy. U žycharki Baranavickaha rajona, akramia inšych traŭmaŭ, amputavanyja dźvie nahi.
Heta zdareńnie stała trecim vypadkam traŭmiravańnia ludziej čyhunačnym transpartam na terytoryi Baranavickaha rehijonu z pačatku hetahaha hoda.
U vychadnyja na terytoryi Biełarusi adbyłosia jašče niekalki čyhunačnych zdareńniaŭ. U noč z 12 na 13 sakavika nie pierahonie Červina—Orša—Uschodniaja hruzavym ciahnikom «Mahiloŭ—Viciebsk» byŭ śmiarotna traŭmavany 19-hadovy žychar Aršanskaha rajona.
Dniom 13 sakavika na stancyi «Nieharełaje» aŭtamašyna «VAZ» vyjechała na nieachoŭny čyhunačny pierajezd, abstalavany spraŭnaj śvietłavoj i hukavoj sihnalizacyjaj. Lehkavuška sutyknułasia z elektraciahnikom «Minsk—Brest». U vyniku sutyknieńnia łakamatyŭ i aŭtamašyna atrymali miechaničnyja paškodžańni. Paciarpiełych, na ščaście, nie było.
Hladzi jašče: Ryzykujučy žyćciom, viaskoviec vyciahnuŭ piensijanierku z-pad kołaŭ elektryčki
