Siońnia ŭ Hrodnie adbyŭsia sud nad supracoŭnikam časopisa Sajuza palakaŭ Biełarusi «Magazin Polski» Alaksiejem Salejem. Sudździa Leninskaha suda Natalla Kozieł pryznačyła pakarańnie – 7 sutak aryštu za «łajanku i niepadparadkavańnie supracoŭnikam milicyi».
Sud pačaŭsia ŭ 14.30 i doŭžyŭsia prykładna 30 chvilin. Śviedkami z boku abvinavačańnia vystupili milicyjaniery Pićko i Viečar, prośbu zaprasić śviedkaŭ z boku A. Saleja sudździa adchiliła.
Učora a 19-aj hadzinie dvoje čałaviek ŭ cyvilnym zatrymali Alaksieja Saleja na skryžavańni vulic Budzionnaha i Ažeški, kali jon viartaŭsia na pracu z apteki, dzie nabyvaŭ leki ad prastudy.
Alaksieja Saleja advieźli ŭ adździaleńnie Leninskaha RAUS Hrodna i paviedamili, što jon zatrymany na padstavie artykuła 156 (drobnaje chulihanstva) Administratyŭnaha kodeksu. Astatni čas da sudu – krychu mienš sutak – Alaksieja pratrymali ŭ milicejskim pastarunku. Karystacca mabilnym telefonam jamu było zabaroniena.
Vypadkovym śviedkam zatrymańnia staŭ znajomy A.Saleja, jaki papiaredziŭ ab zdareńni jaho kaleh, a tyja ŭ svaju čarhu svajakoŭ.
