Abjadnanyja demakratyčnyja siły Homielščyny zapłanavali pajezdku pa paciarpiełych ad katastrofy na Čarnobylskaj AES rajonach.
Jak paviedamiŭ kiraŭnik abłasnoj arhanizacyi Abjadnanaj hramadzianskaj partyi Vasil Palakoŭ, siabry demakratyčnych partyj i abjadnańniaŭ vobłaści sfarmujuć dźvie hrupy. Adna pajedzie pa maršrucie Chojniki — Brahin, inšaja naviedaje Karmu, Čačersk i Vietku.
Vasil Palakoŭ:
— U hetych nasielenych punktach płanujecca ŭskładańnie kvietak i ŭšanavańnie pamiaci achviaraŭ technahiennaj katastrofy na Čarnobylskaj AES. Taksama, kali budzie mahčymaść, my pasprabujem naviedać tych ludziej, jakija žyvuć u zabrudžanaj zonie. Budziem udakładniać i daznavacca pra ŭmovy žyćcia žycharoŭ paciarpiełych rajonaŭ. Sprava ŭ tym, što hetaja katehoryja ludziej faktyčna kinutaja ŭładami. Čarnobylskaja prablematyka, niahledziačy na toje, što nastupstvy avaryi nie pieraadolenyja (ich, zrešty, i niemahčyma pieraadoleć), zamoŭčvajecca. Naadvarot, usio robicca dla taho, kab ničoha nie pradprymałasia dla dapamohi ludziam.
Pradstaŭniki Abjadnanych demakratyčnych siłaŭ vobłaści padavali zajaŭku ŭ harvykankam na praviadzieńnie ŭ Homieli antyjadziernaha mitynha. Ale dahetul ad vykanaŭčych uładaŭ niama anijakaha adkazu.
Niezaležna ad rašeńnia haradskoha kiraŭnictva, raspavioŭ Vasil Palakoŭ, miascovyja demakraty 26 krasavika ŭskładuć vianki i kvietki da Čarnobylskaj kaplički la abłasnoha ŭpraŭleńnia MNS.
