Pabačyŭšy na NTV interviju adnaho viadomaha palityčnaha muža nakont taho, jakim vialikim sympatykam SSSR jon byŭ i jość, padumaŭ: kali b toj palityk mieŭ dziońnik, staronka za 8 śniežnia 1991-ha vyhladała b nastupnym čynam:
3.00. Prakinuŭsia ad žudasnaha snu. Byccam ja prezydent niejkaj respubliki, jakaja ŭźnikła na razvalinach Savieckaha Sajuzu. I byccam ja na nažach z Maskvoj, bo rasiejcy ŭźniali nam myta na pastaŭki škłoačyščalnika, ź jakoha my honim alkaholny surahat na ekspart u Eŭropu. Durny son. Što b heta mahło značyć – niaŭžo ŭ mianie prablemy z psychikaj? Usio, basta! Treba zaniacca sportam – fechtavańniem abo chakiejem.
5.55. Prakinuŭsia tamu, što nia moh dačakacca himnu SSSR.
6.00–6.10. Uvažliva słuchaŭ melodyju na słovy Michałkova – El Rehistana i muzyku Alaksandrava. Jakaja moc!
7.30–8.30. Napisaŭ zajavu ab adstaŭcy z postu deputata VS. Jak saviecki čałaviek, nie mahu być pieškaju ŭ hulniach buržuaznych nacyjanalistaŭ.
9.00. Pasłuchaŭ naviny. Siońnia ŭ Puščy sustreča Jelcyna, Kraŭčuka i Šuškieviča. Dyktar kaža, što trojka razrulivaje niejkija enerhietyčnyja prablemy. Što i kazać – palityčnyja liliputy! U toj čas, kali 300 miljonaŭ źbirajucca śviatkavać 31 śniežnia čarhovuju hadavinu naradžeńnia vialikaj dziaržavy!
12.10. Tolki što pa radyjo pieradali, što ŭ Viskulach pastaŭlena pytańnie pra rospusk Sajuzu. Heta katastrofa! Treba niešta rabić! Adnak što?
13.45. Miarkuju, što Maskva pavinna dać zahad biełaruskim strukturam KDB aryštavać biełavieskich zubroŭ. Sprabavaŭ datelefanavacca na Łubianku. Narešcie pačuŭ hołas niejkaha aficera. Na maju prapanovu toj adpavioŭ: «Viedajecie, ja tolki što viarnuŭsia z Drezdena. Tam usio na rynkavych pryncypach. Čas i nam pierajści na hetuju formułu. Takim čynam, my zvonim vašamu KDB, a vy nam... Što ŭ vas, darečy, jość?» Uzhadaŭ, što ŭ mianie jość karova Miłka. Adnak heta było jamu niecikava. Pakłaŭ trubku.
14.00. Telefanavaŭ ad imia Harbačova biełaruskamu KDB i zahadaŭ terminova aryštavać trojku. Na tym kancy linii pačali ździekavacca z majoj trasianki. Kažuć, nia dumali, Michał Siarhiejevič, što vy tak časta zatarvajeciesia na Červieńskim rynku.
15.08. Sieŭ u ciahnik na Bieraście. Pa darozie na vakzał, kala kulinaryi na praspekcie, niečakana sustreŭ Jakuboviča – macioraha antysavietčyka, jaki padčas putču najaždžaŭ na HKČP. Prapanavaŭ jamu stać redaktaram «Sovietskoj Biełoruśsii». Pavał Izotavič nazvaŭ mianie abłomkam historyi. Začapiła. Hy-hy-hy.
21.30. La vakzalnych kaviarniaŭ u Bieraści mnoju vypracavany hienijalny plan – razam z masami pracoŭnych praniknuć u Pušču i źniščyć antysavieckuju chuntu. Pajdu padymać narod.
22.45. Ledź vyrvaŭsia z pastarunku MUS. Chacieli pryšyć artykuł za toje, što chadziŭ pa vakzale i niecenzurna łajaŭsia (hetak jany nazyvajuć patryjatyčnyja zakliki). Admazaŭsia, spasłaŭšysia na Paźniaka, jaki niejak u restaranie Viarchoŭnaha Savietu vyvieŭ teoryju ab tym, što ŭ biełaruskaj movie niama niecenzurnych słoŭ. Pavieryli.
23.00. Darahi dziońnik, mahčyma, heta moj apošni zapis. Ja siadžu ŭ zasadzie kala domiku, dzie sabralisia antysavieckija judy. Zaraz sa słovami pieśni «Sajuz nierušymy» ŭstanu i pajdu ŭ apošni boj. Kali zahinu, prašu ličyć mianie siabram frakcyi «Kamunisty za demakratyju».
23.30. Usio prapała. Pakul dabieh da zali, vyśvietliłasia, što damova pra rospusk SSSR ŭžo padpisanaja. Heta kapiec. Surjozna dumaju pra suicyd.
23.45. Vyrašyŭ adpomścić za Sajuz. Dumaju abracca prezydentam hetaj krainy i adnavić SSSR. Darečy – kab nie zapadozryli, spačatku prykinusia jołupniem: abaviazkova prahałasuju ŭ parlamencie za ratyfikacyju biełavieskich damovaŭ. A zaraz spać.
3.00. Znoŭ žudki son. Byccam mianie sudziać za niejkija pravy čałavieka...
