U banki razasłany pieralik kodaŭ TN ZED, jakija mohuć ŭklučacca ŭ zajaŭki na nabyćcio valuty na biržy dla impartu miedykamientaŭ.
U adpaviednaści ź listom, tekst jakoha maje ahienctva «Interfaks-Zachad», u pieralik uklučany 83 pazicyi kodaŭ TN ZED. Takim čynam, valuta dla impartu adpaviednych tavaraŭ miedycynskaha pryznačeńnia moža nabyvacca na tarhach Biełaruskaj valutna-fondavaj biržy ŭ pieršačarhovym paradku.
U pieralik uvajšli farmaceŭtyčnyja substancyi, hatovyja miedpreparaty, raschodnyja materyjały dla farmaceŭtyčnaj pramysłovaści i achovy zdaroŭja, miedycynskaja technika i zapčastki da jaje. U pryvatnaści, u pieralik uklučanyja polivitaminnyja kompleksy, śpirtavyja nastojki, vazielin, preziervatyvy, vietpreparaty, vata.
Jak paviedamlałasia, NBB z 1 krasavika kantraluje prodaž zamiežnaj valuty na biržy pa aficyjnym kursie ŭ miežach prapanovy ŭ vyhladzie abaviazkovaha prodažu častki valutnaj vyručki. Valuta pradajecca imparcioram na biržy zychodziačy z nastupnych pryjarytetaŭ: miedykamienty, haz, valutnyja kredyty.
Z daty ŭstupleńnia ŭ siłu dadzienaha paradku termin «miedykamienty» nie rasšyfroŭvajecca, što vyklikała prablemy ŭ biełaruskich farmpradpryjemstvaŭ, jakija byli pazbaŭlenyja mahčymaści nabyć pa aficyjnym kursie zamiežnuju valutu dla impartu substancyj i raschodnych materyjałaŭ dla ŭłasnaj vytvorčaści va ŭmovach fiksavanych roźničnych koštaŭ na lekavyja srodki.
NBB, sa svajho boku, vykazvaŭ zakłapočanaść rezkim rostam biržavoha popytu na valutu dla impartu miedykamientaŭ, padazrajučy machinacyi ŭ častcy śviadomaha naroščvańnia składoŭ impartnych miedpreparataŭ. U suviazi z hetym 5-6 maja NBB prypyniŭ prodaž valuty na biržy dla impartu miedykamientaŭ, majučy namier razabracca ŭ situacyi. Śledstvam hetaha analizu staŭ padrychtavany ŭradam pieralik kodaŭ TN ZED, na jakija raspaŭsiudžvajecca ilhotny paradak nabyćcia valuty na biržy na fonie rezkaha źnižeńnia kursu biełaruskaha rubla na pazabiržavym rynku, dzie abmienny kurs pieravyšaje Br5 tys./$1 suprać krychu bolš za Br3 tys./$1 na biržy.
