Aktyvisty anarchisckaha ruchu Maksim Vietkin i Jaŭhien Sielivončyk pryznali svaju vinu častkova, Ihar Alinievič, Mikałaj Dziadok i Alaksandr Franckievič viny nie pryznajuć.
Praces nad piaćciu anarchistami pačaŭsia 18 maja ŭ sudzie Zavodskaha rajona Minska. Jany abvinavačvajucca va ŭčynieńni šerahu napadaŭ na budynki, padpałaŭ i inšych złačynstvaŭ. U pryvatnaści, u praviadzieńni niesankcyjanavanaj antyvajennaj akcyi kala budynka Ministerstva abarony Biełarusi ŭ 2009 hodzie, zakidvańni butelkami z zapalnaj sumieśsiu terytoryi pasolstva Rasii ŭ Minsku i budynka Centra izalacyi pravaparušalnikaŭ (CIP) na vulicy Akreścina ŭ 2010 hodzie. Im taksama inkryminujecca šerah napadaŭ na inšyja budynki — zakidvańnie fajerami staličnaha kazino «Šanhry Ła» i budynka Fiederacyi prafsajuzaŭ Biełarusi.
Franckieviču akramia hetaha vystaŭlena abvinavačańnie va ŭzłomie sajta Navapołackaha harvykankama, što kvalifikujecca na padstavie č. 2 art. 351 KK (kampjutarny sabataž).
Usim piaciarym pahražaje pakarańnie ŭ vyhladzie pazbaŭleńnia voli da 12 hadoŭ.
Vietkin i Sielivončyk pryznali svaju vinu pavodle č. 2 art. 339 Kryminalnaha kodeksa (złosnaje chulihanstva), ale nie pryznali viny pavodle č. 2 art. 218 (naŭmysnaje źniščeńnie abo paškodžańnie majomaści).
Adnak dziaržabvinavaŭca zajaviŭ, što ŭsie padsudnyja «naŭmysna, biespryčynna, nieadnarazova i z vyklučnym cynizmam zahadzia płanavali i ažyćciaŭlali złačynstvy».
Jak paviedamlałasia raniej, Ihar Alinievič abvinavačvajecca ŭ złosnym chulihanstvie (č. 2 art. 339 KK) pa epizodach napadu na rasijskaje pasolstva ŭ noč z 30 na 31 žniŭnia 2010 hoda, va ŭdziele ŭ akcyi kala Hienštaba Uzbrojenych sił Biełarusi 19 vieraśnia 2009 hoda, u napadzie na kazino «Šanhry Ła», na ofis banka
Mikałaj Dziadok abvinavačvajecca va ŭdziele ŭ akcyi kala Hienštaba pavodle č. 2 art. 339 KK (złosnaje chulihanstva, učynienaje hrupaj asob), a taksama ŭ napadach na kazino «Šanhry Ła» i na budynak Fiederacyi prafsajuzaŭ.
Maksim Vietkin abvinavačvajecca ŭ napadzie na rasijskaje pasolstva i adździaleńnie «Biełarusbanka» ŭ Minsku na padstavie č. 2 art. 339 i č. 3 art. 218 KK.
Alaksandru Franckieviču vystaŭlena abvinavačańnie na padstavie č. 2 art. 339 KK za toje, što jon zdymaŭ na videa napad na aporny punkt milicyi ŭ Salihorsku. 14 lutaha jamu vystavili novaje abvinavačańnie — udzieł u akcyi kala Hienštaba (č. 2 art. 339 KK).
Jaŭhien Sielivončyk abvinavačvajecca pavodle č. 2 art. 218 i č. 2 art. 339 KK za toje, što sumiesna z Franckievičam 9 sakavika 2010 hoda raźbiŭ šybu ŭ apornym punkcie milicyi ŭ Salihorsku.
