Andrej Paźniak: Pastaviŭ u carkvie śviečki za ŭsich, chto zastaŭsia tam

Andreju Paźniaku prysudzili 2 hady abmiežavańnia voli biez nakiravańnia ŭ miescy adbyćcia pakarańnia, jaho vyzvalili u zale sudu. Pieršaje intervju jon daŭ Svabodzie, kali jechaŭ razam z baćkam da svajoj 10-hadovaj dački.

Andrej, što vy pieršaje zrabili na svabodzie?

Pieršaje na svabodzie - ja vyjšaŭ i ŭzdychnuŭ hetym śviežym pavietram svabody. Mnie vielmi ciažka było ŭjavić, što ja moh vyjści... i schadziŭ u carkvu i pastaviŭ śviečki za tych, chto jašče zastaŭsia tam, chto za ich zmahajecca, pieražyvaje... za ŭsich-usich-usich-usich pastaviŭ śviečki, pamaliŭsia, pierachryściŭsia.

Jak vy miarkujecie, čamu vy adziny ź siami fihurantaŭ atrymali ŭmoŭnaje pakarańnie?

Ja nie mahu adkazać. Ja dumaju, što mnie dapamoh Haspodź, i heta supadzieńnie abstavinaŭ.

Vy, napeŭna, upieršyniu sustrelisia na łavie padsudnych ź fihurantami spravy 19 śniežnia Statkievičam, Vusam, Kłaskoŭskim, Hrybkovym, Bułanavym, Kviatkievičam. Jak vy miarkujecie, čamu tak adbyłosia, što vas sudzili razam?

Ja nie mahu viedać, bo ŭsich sudzili pa-roznamu, ja ni ź kim nie byŭ znajomy i navat nikoha nia viedaŭ u tvar, ni ź kim nie stasavaŭsia, ja nia viedaju, heta tak užo vyrašyli vorhany.

Jak składvalisia adnosiny pamiž padsudnymi padčas sudovaha pracesu? Niešta admietnaje zapomniłasia?

Razmaŭlać nam nie dazvalali, bo heta nie dazvolena zakonam. Usie trymalisia družna, usie adzin adnaho padtrymlivali emacyjna, kožny adzin adnaho adčuvaŭ dušeŭna, dušeŭnaje sychodziła ciapło adzin da adnoha. Nie mahu adkazać na hetaje pytańnie inakš. Tamu što ŭsie apynulisia za kratami niečakana, i kožny viedaŭ, što jon - nievinavaty.

Vy zaŭziatar futbolnaha klubu BATE. Ci padtrymlivali vas padčas śledztva, sudovaha pracesu vašy siabry-zaŭziatary?

Usie padtrymlivali, i nia tolki BATE - usia Biełaruś i za miažoj, usie zaŭziatary, usie blizkija, rodnyja ludzi, i navat tyja, chto nia blizki - usie padtrymlivali. Dziakuj vialiki ŭsim chto nas padtrymlivaŭ, i nia tolki mianie adnaho, ale i inšych.

Jak trymalisia vašy baćki? Vaša dačka?

Ja jašče ŭ darozie, jedu z baćkam. Vielmi pieražyvajem za toje, što zdaryłasia, abmiarkoŭvajem. Jedu naŭprost da dački, chaču ŭbačyć dačku. Ja jaje stolki nia bačyŭ, maleńkuju dačku. Chaču jaje abniać i pacałavać.

Čamu navučyła vas turma?

Heta takaja škoła - heta nie pieradać na słovach... Stolki mnoha ludziej nievinavatych, i nia tolki pa palityčnych artykułach, šmat roznych ludziej. Usie cierpiać. Za kožnaha treba malicca, kožnamu niejkuju akazvać dapamohu, bo inakš nielha - treba trymacca razam. Bo ludziam patrebnaja dapamoha paŭsiul, nia tolki ŭ turmie. Ja liču, što najlepšaje - heta ćviordaść, ciarpimaść i nadzieja na samaje lepšaje.

Što było samym strašnym u źniavoleńni? Ci ŭžyvalisia ŭ dačynieńni da vas katavańni?

Nie, u dačynieńni da mianie takich katavańniaŭ nie było. Samaje ciažkaje dla mianie - heta adčuvać što adbyvajecca tut, na svabodzie. Jak tvaje blizkija, usie astatnija, voś heta było samy ciažki stan - być daloka ad svaich rodnych.

Kamu vy ŭdziačny za vyzvaleńnie?

Usim-usim, chto za mianie pieražyvaŭ, chto prykłaŭ čaścicu siabie dla pieražyvańnia za mianie i ŭsich astatnich, i ja liču - Haspodź dapamoh. I ja liču - jašče ŭsio napieradzie i samyja lepšyja časy jašče nastanuć, i ŭsich ludziej pavinny vyzvalić.

Ci vyjšli b jašče raz na Płošču?

Na hetaje pytańnie ja zaraz nie mahu adkazać, tamu što, sami razumiejecie: jak ja mahu adkazać - mianie tolki vyzvalili z turmy... Heta majo mierkavańnie.

• 0
• 0
• 0
• 0
• 0
• 0
• 0
• 0