Biełaruskaja asacyjacyja žurnalistaŭ źviarnułasia da Łukašenki

Praŭleńnie HA «BAŽ» adreahavała na zajavy Alaksandra Łukašenki, zroblenyja padčas pres-kanfierencyi 17 červienia, na jakoj jon u niečakanym kantekście zhadaŭ i Biełaruskuju asacyjacyju žurnalistaŭ: prezident vykazaŭ pažadańnie, kab BAŽ źviarnuŭsia da jaho asabista z prośbaj ab vyzvaleńni palitźniavolenych.

«Kali ministr zamiežnych spraŭ paličyć nieabchodnym ich vyzvalić, jon matyvavana ŭniasie prapanovu, i prezident budzie hetyja prapanovy razhladać, — dasłoŭna skazaŭ Łukašenka. — I nie tolki ministr zamiežnych spraŭ, ale i deputaty, moža być, i žurnalisckaja supolnaść… Voś heta žurnalisckaja supolnaść („Biełorusy i rynok“, napeŭna, uvachodzić tudy)… jak jana nazyvajecca ŭ nas… dzie tam ci to apazicyjnaje, ci to jakoje… BAŽ, tak, BAŽ! Niešta jano nie niasie hetych prapanovaŭ. Niachaj unosić. Heta ich biźnies, kab ty viedaŭ. Heta ich biźnies. I BAŽ — taksama…».

Praŭleńnie HA «BAŽ» pryniało zvarot da kiraŭnika dziaržavy i nakiravała jaho zamoŭnym listom na adras Administracyi Prezidenta Respubliki Biełaruś. Nižej vašaje ŭvazie tekst dakumienta:

Zvarot HA «Biełaruskaja asacyjacyja žurnalistaŭ» da Prezidenta Respubliki Biełaruś Łukašenki A. R.

Hramadskaje abjadnańnie «Biełaruskaja asacyjacyja žurnalistaŭ» źviartajecca da Vas u suviazi z Vašym vykazvańniem na pres-kanfierencyi 17 červienia hetaha hoda ab tym, što Vy hatovy razhledzieć pytańnie ab vyzvaleńni ŭdzielnikaŭ padziej 19 śniežnia 2010 h., kali žurnalisckaja supolnaść vystupić z takim zvarotam.

Siarod asudžanych za arhanizacyju i ŭdzieł u masavych biesparadkach, arhanizacyju dziejańniaŭ, jakija hruba parušajuć hramadski paradak, 6 žurnalistaŭ i siabraŭ HA «Biełaruskaja asacyjacyja žurnalistaŭ»: Alaksandr Atroščankaŭ, Dźmitryj Bandarenka, Pavieł Sieviaryniec, Iryna Chalip, Siarhiej Vaźniak, Alaksandr Fiaduta.

HA «Biełaruskaja asacyjacyja žurnalistaŭ» ličyć ich kryminalny pieraśled abmiežavańniem svabody vykazvańnia mierkavańniaŭ, harantavanaj art.art 33, 34 Kanstytucyi Respubliki Biełaruś i art. 19 Mižnarodnaha pakta ab hramadzianskich i palityčnych pravach. Zaklikajem Vas jak haranta Kanstytucyi, pravoŭ i svabod čałavieka i hramadzianina damahčysia vyzvaleńnia i spynieńnia kryminalnaha pieraśledu ŭdzielnikaŭ padziej 19 śniežnia 2010 h.

Upeŭnienyja, što takoje Vaša rašeńnie samym stanoŭčym čynam było b uspryniata i ŭnutry krainy, i za miežami, pryviało b da źnižeńnia sacyjalnaj napružanaści ŭ biełaruskim hramadstvie i pazityŭna adbiłasia b na imidžy dziaržavy.

Źviartajem Vašu ŭvahu na toje, što situacyja sa svabodaj vykazvańnia mierkavańniaŭ u Biełarusi stała krytyčnaj, i heta tyčycca nie tolki asudžeńnia ŭdzielnikaŭ padziej 19 śniežnia.

Tak, u Hrodna adbyvajecca kryminalny praces pa abvinavačańniu žurnalista Andreja Pačobuta ŭ źniavazie i paklopie ŭ dačynieńni da Prezidenta Respubliki Biełaruś. Nakolki nam viadoma, Vy nie pradjaŭlali da žurnalista pretenzij u suviazi z parušeńniem Vašych asabistych niemajomasnych pravoŭ. Adnak hetuju prerahatyvu ŭziali na siabie supracoŭniki hrodzienskich prakuratury i UKDB.

Niadaŭna było spyniena viaščańnie «Aŭtaradyjo», usia vina jakoha zaklučałasia ŭ tym, što jano vypuściła ŭ efir rekłamny rolik adnaho z kandydataŭ u Prezidenty Respubliki Biełaruś. Takim adyjoznym čynam skončylisia ŭniasieńni źmienaŭ u Vybarčy kodeks, jakija ŭpieršyniu dazvolili palityčnuju rekłamu.

Vialikuju zakłapočanaść vyklikajuć pracesy pa zakryćciu haziet «Narodnaja Vola» i «Naša Niva». Padobnaje ŭmiašalnictva Ministerstva infarmacyi Respubliki Biełaruś u ich dziejnaść parušaje navat minimalnyja standarty dapuščalnaha abmiežavańnia svabody vykazvańnia mierkavańniaŭ.

Zaklikajem Vas:

vyzvalić žurnalistaŭ, roŭna jak i ŭsich hramadzian Respubliki Biełaruś, jakija pryciahnuty da kryminalnaj adkaznaści ŭ suviazi z padziejami 19 śniežnia 2010 h.;

spynić kryminalny pieraśled Andreja Pačobuta;

daručyć Ministerstvu infarmacyi Respubliki Biełaruś adklikać pozvy ab zakryćci haziet «Narodnaja Vola» i «Naša Niva»;

abaviazać Ministerstva infarmacyi admianić rašeńnie ab spynieńni viaščańnia «Aŭtaradyjo».

• 0
• 0
• 0
• 0
• 0
• 0
• 0
• 0