Krainie losam nakanavana zmahacca za zamiežnyja rynki i davać u tabło ŭsim, chto lezie na naš. Hieraičnyja prykłady minułaha mahli b uzdymać kuraž u rekrutaŭ novych handlovych vojnaŭ, nia kažučy ŭžo pra patryjatyčna‑vychavaŭčuju funkcyju.
Čamu, naprykład, my hetak niazdarna prafukvajem pamiać ab pieramožnaj hazavaj vajnie studzienia 2004‑ha, kali kraina, abjadnaŭšysia vakoł lubimaha Ryhoraviča, adbiła nacisk «Hazpromu»?
Ujavicie, što siońnia, padčas pieramovaŭ ź Siamaškam, Miler pabačyŭ by na hrudziach u biełarusa orden «Za abaronu Biełtranshazu» druhoj stupieni.
Hazpromaŭski baron trochi afanareŭ by, razumiejučy, što pierad im nie sałaha, a byvały vajaka, jaki źniuchaŭ nie adnu darožku porachu... oj, prabačcie, — hazu.
Naturalna, treba zamucić respublikanski Sajuz veteranaŭ hazavych vojnaŭ («hazavancy»). Naładzić rehularnyja tusačy z moładździu, jakaja z zachapleńniem słuchaćmie ichnyja prahony, jak dziady tych «hazavancaŭ» z krykam «Za baćku» mužna pieraklučalisia z NTV na adstojny BT, kab tolki nia čuć varožych hałasoŭ. Nie zabycca šče pra konkurs pieśniaŭ veteranaŭ Pieršaj hazavaj vajny. I, naturalna, — Dzień «hazavanca». Hazavancy, jak byłyja pamiežniki abo žaŭniery PDV, mahli b źbiracca na Čeluskincach kupacca ŭ fantanach, žłukcić harełku, barukacca z AMAPam, adnym słovam — kansalidavać svajo bractva.
Ciapier pra muzy. Cechu čarhincoŭskich piśmieńnikaŭ nieadkładna zasieści za seryju patryjatyčna‑hazavych tvoraŭ — «Jany zmahalisia za Biełtranshaz», «Bitva za ventyl», «Trubnaje bractva», «Uspaminy hazavaha vyviednika»...
Na «Biełaruśfilmie» moža złabać niejki filmiec. Naturalna, atrymajecca, jak zaŭsiody, łaža, adnak za košt prymusovych raznaradak dla ŭsich školnikaŭ možna budzie niešta častkova kampensavać. Ahulna kažučy, tema pracy ź dziećmi vielmi važnaja. Možna prymusić usich vychavacielek dziciačych sadkoŭ pisać listy na hazavy front kštałtu «Darahi dziadzia Siamaška, my ŭsioj hrupaj zrabili dla ciabie rahatku. Dałbani ź jaje Hrefu ŭ łob».
Kali b my zapuścili hetkija mulki dva hady tamu, siońnia ŭ hramadztvie była b absalutna inšaja, zdaraviejšaja atmasfera. Nia plotki pra toje, što zajčyku — inflacyjny hamon, panavali b u vahonach pryharadnych elektryčak. Naadvarot, pačuŭšy ab novych zakidonach «Hazpromu», baćka siamiejstva padkručvaŭ by sivy vus: «Voj, nie pajšoŭ maskalu ŭrok u 2004‑ym». Tynejdžery, słuchačy starych, kidali b Counter‑strike i FIFA'2007, zapisvalisia b u atrady, jakija źbirajuć hablušku i kapajuć torf. Žonki i niaviestki zamianiali b mužčyn na aŭtarynku ŭ Malinaŭcy.
I hałoŭnaje, sp.Pralaskoŭski, nie siadzieć na laŭrach! Ja fanareju ad adnoj dumki pra toje, jaki panteon słavy my možam zabacać hierojam apošniaj vajny za rasiejski kandytarski rynak.
