Pra heta zajaviŭ prem'jer-ministr Biełarusi Michaił Miaśnikovič siońnia na sustrečy z pracoŭnym kalektyvam AAT «Ivacevičdreŭ».
«Zarobak dla biudžetnikaŭ da kanca hoda pavyšacca nie budzie, adnak u adpaviednaści z zakanadaŭstvam budzie rabicca indeksacyja ŭ suviazi ź inflacyjaj, — adznačyŭ kiraŭnik urada. — Heta vymušanaja miera».
Što tyčycca vytvorčaha siektara, to rost zarabotnaj płaty budzie prachodzić «u ramkach zaroblenych srodkaŭ».
Adnačasova Miaśnikovič paviedamiŭ, što kurs dalara pakul raści nie budzie. Pavodle słoŭ kiraŭnika ŭrada,
realny kurs — ad Br4,5 tys. da Br5,5 tys. za $1.
Michaił Miaśnikovič padkreśliŭ, što na takim uzroŭni zachavajecca kurs, kali «my nie spravakujem jaho emisijnym kredytavańniem ekanomiki: na žyllo, fiermy, darohi».
Premjer-ministru, takim čynam, dastałasia rola čynoŭnika, jaki havoryć niepryjemnuju praŭdu.
Miaśnikovič padkreśliŭ, što krainie treba rezka skaracić biudžetnyja vydatki. Jon taksama zajaviŭ, što ŭłady voźmucca za tyja 300 tysiač čałaviek pracazdaolnaha nasielnictva, jakija, pavodle aficyjnych źviestak, nidzie nie pracujuć i nie majuć dachodaŭ, ale za niešta žyvuć.
Miaśnikovič taksama pryznaŭ, što enerhietyka i sielskaja haspadarka ŭ krainie zastajucca stratnymi i pryvioŭ šakujučyja ličby stratnaści pry vytvorčaści miasa i małaka.
