Heta jašče nie abjadnańnie, heta — pahadnieńnie

29 červienia pradstaŭniki šaści palityčnych partyi i arhanizacyj zajavili pra stvareńnie sumiesnaj płatformy. «Heta jašče nie abjadnańnie», — zaznačyli jany.

Pradstaŭniki AHP, BNF, «Spraviadlivaha śvieta», Ruchu «Za Svabodu», BCHD i «Havary praŭdu» padpisali pahadnieńnie, dzie patrabujuć vyzvaleńnia palitviaźniaŭ, a taksama praviadzieńnia svabodnych vybaraŭ.

«Adbyvajecca stvareńnie płatformy, abjadnańnie praź dziejańnie, spravu, a nie tolki praz zajavy», — zaznačyŭ Anatol Labiedźka. Na jahonuju dumku, taja ekanamičnaja situacyja ŭ krainie, jakaja isnuje ciapier, jość vynikam adsutnaści volnych vybaraŭ.

Uładzimir Niaklajeŭ na pres-kanfierencyi nie pryjšoŭ, jaho pradstaŭlaŭ Siarhiej Vaźniak. Cikava, pradstaŭniki adnoj partyi «Spraviadlivy śviet» Vaźniak i Kalakin pradstaŭlali roznyja struktury.

Dyk voś u piśmovym zvarocie Niaklajeŭ napisaŭ, što hatovy da lubych abjadnańniaŭ, kab vyciahnuć z turmy palitviaźniaŭ.

Rymašeŭski skazaŭ, što chaj heta i maleńki, ale krok da realnaha abjadnańnia. Milinkievič zaznačyŭ, što my žyviom u składany čas, kali vyrašajecca, ci «my budziem jeŭrapiejskaj dziaržavaj, ci pieryfieryjaj susiedniaj krainy». Na dumku Milinkieviča, siońnia sistemny kryzis maje nie tolki ŭłada, ale i apazicyja. Pryčyna dla apazicyi — słabaja kaardynacyja.

Kali žurnalisty sprabavali ŭdakładnić, ci možna heta nazyvać abjadnańniem, to palityki paprasili nazyvać lepš pahadnieńniem.

Alaksandr Milinkievič adznačyŭ, što kali ŭłada nie pojdzie na hetyja sastupki (vyzvaleńnie palitviaźniaŭ i praviadzieńnie svabodnych vybaraŭ), to ŭdzielničać u vybarach nie varta. Treba taksama pierakanać jeŭrapiejcaŭ nie dasyłać svaich pradstaŭnikoŭ dla nazirańnia za hetymi vybarami.

Udzielniki pres-kanfierencyi pahadzilisia, što prablema lidara vostra pakul nie staić. «Chacia było b dobra jaho mieć», — adznačyŭ Milinkievič.

«Vy ŭsio chočacie stvaryć KPSS, — nie vytrymaŭ Kalakin paśla pytańnia pra strukturu novaj płatformy. — Ale stvareńnie novaha ADS zusim nie abaviazkovaje. Mahčymaje i tak kaardynacyja dziejnaści».

Zarakacca ad krytyki adzin adnaho palityki nie stali. «My ž nie mafiju stvarajem», — jak vobrazna zaznačyŭ Rymašeŭski.

Pra ŭzajemajedačynieńnie z «Revalucyjaj praz sacyjalnuju sietku» Siarhiej Kalakin skazaŭ: «My ź imi ŭ kantakcie, siońnia my budziem tam».

• 0
• 0
• 0
• 0
• 0
• 0
• 0
• 0