Zaviaršeńnie ździełki pa prodažy «Biełtranshaza» čakajecca vosieńniu

Zaviaršeńnie ździełki pa prodažy 50% akcyj AAT «Biełtranshaz» čakajecca vosieńniu. Pra heta paviedamiŭ na pres-kanfierencyi ŭ Minsku 21 lipienia staršynia Dziaržaŭnaha kamiteta pa majomaści Hieorhij Kuźniacoŭ.

«Pieramoŭny praces idzie ciažka, — pryznaŭ jon. — Kali b razmova išła tolki pra dahavor kupli-prodažu, to prablem by vialikich nie było. Ale na hety dahavor naviešany inšyja ŭmovy: taryfy, abjomy».

Samaje ciažkaje — źniać mienavita hetyja pytańni, padkreśliŭ Kuźniacoŭ. «I ad taho, jak jany buduć vyrašany na vysokim uzroŭni z našaha i rasijskaha boku, zaležyć chutkaść pracesu», — dadaŭ kiraŭnik Dziaržkammajomaści.

***

Jak paviedamlałasia raniej, kuplu AAT «Biełtranshaz» abmierkavali 4 lipienia ŭ telefonnaj razmovie staršynia praŭleńnia AAT «Hazprom» Alaksiej Miler i pieršy vice-premjer Biełarusi Uładzimir Siamaška.

Pavodle vynikaŭ razmovy Miler zajaviŭ, što biełaruski bok praciahvaje źviazvać padpisańnie dakumientaŭ pa «Biełtranshazie» z uzhadnieńniem umoŭ novaha kantrakta na pastaŭku hazu ŭ Biełaruś, i heta «moža pryvieści da zaciahvańnia pieramoŭnaha pracesu i ničoha nie źmienić pa sutnaści».

Padčas telefonnaj razmovy taksama było padkreślena, što ŭmovy dziejnaha da kanca 2011 hoda kantrakta nie mohuć być źmienieny, paviedamiła pres-słužba «Hazproma».

19 lipienia ŭ intervju BiełaPAN pasoł Rasii ŭ Biełarusi Alaksandr Surykaŭ zajaviŭ: Rasija razhladaje kuplu «Biełtranshaza» «ŭ bolšaj stupieni jak dapamohu Biełarusi ŭ suviazi z rostam cen na haz, jaki ŭžo adbyŭsia pry pierachodzie na ŭzajemavyhadnyja rynkavyja adnosiny».

Dypłamat padkreśliŭ: Rasija nie bačyć sensu źviazvać nabyćcio druhoj pałovy akcyj «Biełtranshaza» z uzhadnieńniem novych cen na pryrodny haz, jaki budzie pastaŭlacca Biełarusi ŭ najbližejšyja hod-dva.

«Heta dva roznyja pytańni, — skazaŭ Surykaŭ. — My da kanca hoda zapoŭnim „Paŭnočny patok“. Praz „Biełtranshaz“ ža ŭsiaho transpartujecca 14 miljardaŭ kubamietraŭ hazu… Jość u Biełarusi žadańnie ŭtrymać hety tranzit — adno pytańnie, nie — druhoje pytańnie. Što takoje 14 miljardaŭ u ahulnym tranzicie hazu na treku Ukraina — Biełaruś u dźvieście ź liškam miljardaŭ kubamietraŭ? My razhladajem kuplu „Biełtranshaza“ ŭ bolšaj stupieni jak dapamohu Biełarusi ŭ suviazi z rostam cen na haz, jaki ŭžo adbyŭsia pry pierachodzie na ŭzajemavyhadnyja rynkavyja adnosiny. My tady kupili za 2,5 miljarda pałovu truby dla kampiensacyi hetaha rostu cen, ni dla čaho inšaha. I možam kupić druhuju pałovu taksama ŭ bolšaj stupieni z hetych ža mierkavańniaŭ. My razumiejem, što ŭskosna datyčnyja da situacyi, jana častkova pahoršyłasia z-za rostu cen na enierhanośbity. I kuplajučy hetuju trubu, my chočam u tym liku dapamahčy biełaruskamu boku zachavać pa hetaj trubie tranzit. Tamu što kupiŭšy, pavinny budziem užo sami dumać, jak by jana nie prastojvała».

• 0
• 0
• 0
• 0
• 0
• 0
• 0
• 0