«Uziać pad uvahu praciahłuju i daskanałuju słužbu». Bajkovu nie pasadzili
Śviatłanu Bajkovu apraŭdali pa čatyroch ź piaci abvinavačvańniaŭ. Ale prysudzili dva hady «chatniaj chimii».
Śviatłanu Bajkovu apraŭdali pa čatyroch ź piaci abvinavačvańniaŭ. Ale prysudzili dva hady «chatniaj chimii».
Amal piać miesiacaŭ pry začynienych dźviarach u Viarchoŭnym sudzie słuchałasia kryminalnaja sprava suprać staršaj śledčaj Hienieralnaj prakuratury pa asabliva važnych spravach Śviatłany Bajkovaj.
Bajkova była aryštavanaja 25 lutaha 2010 hoda supracoŭnikami KDB. Paśla hetaha jana znachodziłasia paŭhoda ŭ «amierykancy», a ŭ minułym žniŭni jaje pieraviali pad chatni aryšt.
Sprava Bajkova na pieršych parach vyjaviła procistajańnie miž KDB i Hienieralnaj prakuraturaj. Hienprakuror Ryhor Vasilevič vynosiŭ pratest pa zatrymańni svajoj padnačalenaj, ale sud jaho adchiliŭ. Tady Vasilevič admoviŭsia padoŭžyć termin utrymańnia Bajkovaj pad vartaj.
Tym nie mienš, praź niejki čas i hienprakuror raźvioŭ ruki ŭbok, skazaŭšy: «Nie idealizujcie śledčaha». Jon pryznaŭ, što ŭ svajoj pracy Bajkova časta pieravyšała słužbovyja paŭnamoctvy. «Nie zaŭsiody aryšty byli abhruntavanymi i zakonnymi», — skazaŭ Vasilevič.
Faktyčna paśla hetaha Hienieralnaja prakuratura admoviłasia padtrymlivać svaju kalehu. Ludzi, što sutykalisia z Bajkovaj adznačali jaje fanatyčnaść u pracy.
Za što ž aryštavali Bajkovu? Śledčaja viała spravu z kantrabandaj siarod bresckich mytnikaŭ. Taksama joj aryštavany byŭ były kiraŭnik Departamienta finansavych rasśledavańniaŭ Anatol Hramovič, były kadebist. Apošniamu było pradjaŭlena abvinavačvańnie ŭ artykule 258 «Stvareńnie złačynnaj arhanizacyi i ŭdzieł u joj».
Letaś u žniŭni ŭ ŚMI trapili pratakoły dopytu biznesoŭca Paŭła Małočki, jakija pravodziła Śviatłana Bajkova. Cikava jašče, što ŭ efiry ŭ pieradačy «Chrosny baćka» na telekanale NTV vyjšaŭ videadopyt Małočki.
Biznesoviec na kamieru raskazvaŭ asablivaści pracy na mytni. Kali vieryć jahonym słovam, to z kožnaj fury na chabar mytnikam, pamiežnikam i kadebistam išło da siami tysiač dalaraŭ. Darečy, sam Małočka, jaki arhanizoŭvaŭ prajezdy rasijskich mašyn, aryštavany nie byŭ.
Jašče źjaŭlałasia infarmacyja, što kryminalnuju spravu razam z Bajkovaj pačynaŭ raskručvać tahačasny ministr unutranych spravaŭ Uładzimir Navumaŭ, jaki paźniej źjechaŭ u Maskvu. Nie vyklučałasia, što aryšt žančyny moh być pomstaj śpiecsłužb za jaje rasśledavańni.
U turmie Bajkova trymała haładoŭku, a taksama źviartałasia z adkrytym listom da Alaksandra Łukašenki. U im śledčaja pisała pra svaju nievinavataść, a taksama prasiła kiraŭnika dziaržavy ab litaści, kab praciahnuć baraćbu z «trutniami».2 žniŭnia la Viarchoŭnaha suda chadzili svajaki Śviatłany z kvietkami. Vyjšła advakatka Taćciana Kachno, jakaja razmaŭlać z presaj nie zachacieła. Pačułasia tolki, što da svajakoŭ Śviatłana vyjdzie ź inšaha boku, kab nie razmaŭlać z žurnalistami. Muž Dźmitryj pabieh za mašynaj.
Dakładny prysud viadomy jašče nie byŭ. Tym nie mienš, atrymałasia zaśpieć abdymki śledčaj z rodnymi. Joj adrazu dali kvietki i marožanaje. Prośbu parazmaŭlać Bajkova adrazu adchiliła.
Tolki na pytańnie, ci rasčaravanaja jana ŭ biełaruskim zakonie, adkazała: «Kaniečnie».«Jana zaŭždy vieryła, što praŭda pieramoža. Spadziavałasia, što jaje vypuściać, — skazała jaje mama Janina Ivanaŭna. — Ni za što siadzieła. Jana vielmi mocny čałaviek».
Užo paźniej
Pieršapačatkova Bajkova abvinavačvałasia ŭ złoŭžyvańniach pa słužbie, pieravyšeńni słužbovych paŭnamoctvaŭ, niezakonnaje pryciahnieńnie hramadzian da kryminalnaj adkaznaści, zaklučeńni ich pad vartu i prymusu da dačy pakazańniaŭ. Z usich abvinavačvańniaŭ zastałosia tolki pierievyšeńnie słužbovych paŭnamoctvaŭ. Pa ŭsich inšych artykułach jaje apraŭdali.
Jaje prysudzili da 2 hadoŭ abmiežavańnia voli biez nakiravańnia va ŭstanovy adkrytaha typu, to bok «chatniaj chimii». Pry hetym pryznaŭšy, što ŭ dziejańniach śledčaha nie było złych namieraŭ. Pad uvahu ŭziałasia praciahły pieryjad słužby ŭ hienprakuratury, a taksama dziaržaŭnyja ŭznaharody. Kali brać pad uvahu, što dzień turmy idzie za dva dni «chimii», to termin źniavoleńnia śledčaj užo skončyŭsia.
Žurnalistaŭ taksama cikaviŭ los Karena Vartaniana, jaki nibyta vybivaŭ pakazańni dla Bajkovaj i išoŭ ź joj pa adnoj spravie. Adnak nijakaj infarmacyi atrymać adpres-sakratara tak i nie ŭdałosia.
Kamientary