Žychary roznych rajonaŭ skardziacca na biaździejańnie adpaviednych słužbaŭ.
Žychary roznych rajonaŭ skardziacca na biaździejańnie adpaviednych słužbaŭ.
U «Našu Nivu» źviarnulisia žychary doma № 70 pa vulicy Sierdziča ŭ Minsku. Jany skardziacca na toje, što padjezdy ichniaha doma zapałanili błochi. Pa ich słovach nasiakomyja ŭ vialikaj kolkaści źjavilisia tydzień tamu, a adpaviednyja słužby, niahledziačy na telefanavańni i asabistyja vizity da ich, dahetul ničoha nie zrabili. Alaksandr žyvie ŭ kvatery №17 na pierym paviersie.
«Strašna zajści ŭ padjezd. Pakul da kvatery dabiažyš — nohi ŭsie čornyja».Jon kaža, što ŭpieršyniu pabačyŭ błoch u svajoj kvatery ŭ minuły aŭtorak. Vyjšaŭ na placoŭku i zrazumieŭ, što jany źjaŭlajucca z padvała. «U nas uvieś čas zaciahvajecca kapramont, tamu ŭ padvale sucelnaja antysanitaryja. Tam u nas ciepłatrasa akurat prachodzić, tamu tam zaŭsiody poŭna badziažnych katoŭ». U toj samy dzień Alaksandr źviarnuŭsia ŭ domakiraŭnictva, tam paraili pačakać da piatnicy. Ale ŭ piatnicu nichto nie pryjechaŭ. Patelefanavali na «haračuju liniju» administracyi Frunzienskaha rajona. U administracyi zapisali prośbu i… usio zastałosia pa-raniejšamu, kaža žychar doma. Pa jaho słovach, u ŽESie im paabiacali vypravić situacyju, ale błochi jak skakali pa padjeździe, tak i skačuć. I z kožnym dniom ich stanovicca ŭsio bolš.
«Ja žyvu ŭ hetym domie dzieviać hod i ŭpieršyniu tut takoje baču. Babuli z našaha padjezda pryhadvajuć, što niešta padobnaje było tut hadoŭ 25 tamu. Moža i było, ale my žyviom u inšy čas i heta prosta dzikaść»,— aburajecca Alaksandr. Jon kaža, što skočki pačali apanoŭvać i padjezdy susiednich damoŭ.
Susied Alaksandra Siarhiej paćviardžaje jaho słovy. «Apošnija dni da kvatery my litaralna biažym, kab nie zanieści błoch u žytło. U padvał užo nie chodzim, i nie tolki my. Što tam padvał, ja navat kala paštovaj skrynki nie zatrymlivajusia». Siarhiej chvalujecca za dziaciej, jakich ciapier davodzicca zanosić damoŭ na rukach.
Jon kaža, što ŭ susiednim domie prapisanaja staršynia CVK Lidzija Jarmošyna, i z hetym faktam źviazvaje nadziei na ščaślivaje vyrašeńnie situacyi z antysanitaryjaj.«Kažuć, što błochi ŭžo abžyli i toj dom», — uśmichajecca jon. (Jarmošyna žyvie ŭ Drazdach.)
Reparcior «Našaj Nivy» byŭ śviedkam taho, jak žančyna na bałkonie litaralna vytrasała kata ad skočak.
U ŽESie, jaki absłuhoŭvaje dom №70, nam pakul nie ŭdałosia atrymać tłumačeńni nakont situacyi ŭ damach na vulicy Sierdziča. Adkaznych śpiecyjalistaŭ nie było na miescy.
Błochi (pa-biełarusku ich jašče nazyvajuć skočki) adnosiacca da atradu kryvasosnych nasiakomych. Jany źjaŭlajucca pieranosčykami niebiaśpiečnych zachvorvańniaŭ, takich, jak naprykład, hiepatyt V, S. Błochi sielacca na žyviole i ptuškach. Na ludziach nadoŭha nie zatrymlivajucca, ale nie praminajuć mahčymaści ŭčapicca za nohi. Ukusy błoch vyklikajuć mocnaje razdražnieńnie, balački zahojvajucca značna daŭžej za ŭkusy kamaroŭ.
* * *
U kamientarach ludzi paviedamlajuć, što prablema z błochami stała aktualnaj i ŭ inšych rajonach horada.
Jak mučyli Cila Švajhiera i centry haradoŭ, kab stvaryć karcinku dla sudzimaha za machlarstva prateže Dźmitryja Baskava10
Kamientary