Začystka pierad vybarami

Napiaredadni miascovych vybaraŭ — jany prachodziać u niadzielu 14 studzienia — pravaachoŭnyja orhany praviali šerah preventyŭnych zatrymańniaŭ apazycyjnych aktyvistaŭ pa ŭsioj krainie: ab Bieraścia da Viciebska. Zatrymańni adbyvajucca pa takim sama scenary, jak pierad prezydenckimi vybarami ŭ sakaviku.

U čaćvier pry razdačy ahitacyjnych ulotak byŭ zatrymany staršynia AHP Anatol Labiedźka. Jaho razam z davieranaj asobaj kandydata Antaninaj Kavalovaj advieźli ŭ Saviecki RUUS Miensku. Paśla tłumačeńniaŭ ich adpuścili. Anatola Labiedźku na hetym tydni zatrymlivajuć druhi raz pry razdačy pieradvybarčych ulotak. U piatnicu staršynia vyrašyŭ źniać kandydaturu z vybarčaj honki.

18-hadovy Siaržuk Huminski z Voršy byŭ zatrymany milicyjantami ŭ sieradu viečaram, jaho advieźli ŭ pastarunak, dzie dapytvali z prymianieńniem fizyčnaj siły. U piatnicu Huminski nakiravaŭsia ŭ aršanskuju milicyju pa tłumačeńni hetaha incydentu. Tam jaho zatrymali i adrazu advieźli ŭ sud. Chłopca abvinavacili ŭ drobnym chulihanstvie (artykuł 156 Administracyjnaha kodeksu) i niepadparadkavańniu milicyi (artykuł 166). Sudździa Bondaraŭ pakaraŭ maładoha čałavieka tryma sutkami aryštu. Jašče ŭ zali sudu Siaržuk abvieściŭ haładoŭku.

11 studzienia ŭ Barysavie byŭ zatrymany lider miascovaj supołki Partyi BNF Siarhiej Sałaš, jaki źjaŭlajecca davieranaj asobaj kandydata ŭ deputaty, ekanamista Źmitra Babickaha. Noč Sałaša pratrymali ŭ izalatary časovaha ŭtrymańnia. Sud nad im pačaŭsia z samaj ranicy, ale prysud staŭ viadomy tolki a 6-j viečara. Siarhiej atrymaŭ piać nočaŭ aryštu. Pierad prezydenckimi vybarami Sałaš taksama siadzieŭ.

U čaćvier u Biarozie i ŭ Bieraści dvojčy byŭ zatrymany Alaksandar Milinkievič. Jon jeździŭ pa Paleśsi i sustrakaŭsia z vybarščykami.

U Horadni na čaćviora sutak aryštu asudžany davieranaja asoba kandydata ŭ deputaty miascovaha harsavietu Sieržuka Antusieviča Maksim Hubarevič, jaho taksama abvinavacili ŭ drobnym chulihnstvie. Viečaram u piatnicu adbyłosia zatrymańnie jašče adnoj davieranaj asoby — Mikałaja Lemianoŭskaha, jon budzie znachodzicca pad vartaj da sudu, jaki adbudziecca tolki ŭ paniadziełak. Jašče raniej u Horadni asudzili na piaciora sutak Andrusia Famina, jaho prosta na aŭtobusnym prypynku zabrali ludzi ŭ cyvilnym, abvinavaciŭšy, što jon spraŭlaŭ pilnicu. Famin źjaŭlajecca davieranaj asobaj kandydata ŭ deputaty Valerja Kisiala. Taksama piatnicu adbyłosia zatrymańnie aktyvista Sajuzu palakaŭ Stasia Pačobuta, na čyhunačnym vakzale zatrymali moładzievych aktyvistaŭ Jaŭhiena Skrabatuna i Volhu Smalančuk. Hetyja pryjechali z Polščy na vychodnyja.

U Partyzanskim RUUSie Miensku znachodzicca aktyvist AHP Andrej Dźmitryjeŭ, jaki byŭ zatrymany siońnia hrupaj ludziej u cyvilnym. Nastaśsiu Alaksandrovič, moładzievuju aktyvistku BNF, zatrymali prosta na kvatery.

U Viciebsku prajšli zatrymańnie pravaabaroncy Valerja Ščukina, a siabra KCHP-BNF Barys Chamajda byŭ asudžany na čaćviora sutak aryštu.

U Pinsku pajšli jašče dalej, na sutkach akazalisia kandydaty ŭ deputaty miascovaha harsavietu – Alaksandar Vasiljeŭ (7 sutak) i Alaksandar Ramanovič (5 sutak).

U Pružanach piać sutak aryštu dastaŭ siabra Abjadnanaj hramadzianskaj partyi Ŭładzimier Radzivončyk.

Vidavočna, što heta źviazana ź miascovymi vybarami. Nichto z aktyvistaŭ nie dastaŭ vialikich terminaŭ. Prysudy aktyvistam raźličanyja na toje, što demakraty vyjduć z turmaŭ akurat paśla vybaraŭ, u paniadziełak-aŭtorak. Niešta padobnaje ŭžo zdarałasia letaś u sakaviku napiaredadni prezydenckich. Tady pierad vybarami pa ŭsioj krainie byli zatrymanyja sotni aktyvistaŭ. Što hetak zapałochała ŭłady napiaredadni miascovych vybaraŭ nieviadoma, bo kolkaść demakratyčnych kandydataŭ, što balatujucca na miascovych vybarach, składaje mienš za 1%. Napeŭna, hetyja metadyčnyja zatrymańni majuć na mecie metadyčnaje zastrašvańnie demakratyčnych aktyvistaŭ i niedapuščeńnie kantrolu za padlikam hałasoŭ.

• 0
• 0
• 0
• 0
• 0
• 0
• 0
• 0