Prośba pačakać

Ministerstva finansaŭ Rasii ličyć dačasnym havaryć ab źmianieńni hrafika vydzialeńnia kredytu Biełarusi pa linii JeŭrAzES

Takaja reakcyja Minfina Rasii adbyłasia paśla taho, jak 25 žniŭnia pradstaŭnik Jeŭrazijskaha banka raźvićcia, jaki kiruje srodkami Antykryzisnaha fondu JeŭrAzES, nie vyklučyŭ, što terminy vydzialeńnia Biełarusi druhoha tranšu kredytu z Antykryzisnaha fondu JeŭrAzES mohuć być pieraniesienyja ŭ suviazi z adsutnaściu reform u ekanomicy.

«Na dumku Minfina Rasii, na hety momant pakul dačasna havaryć ab tym, ci budzie nakiravany druhi tranš kredytu pa raniej uzhodnienym hrafiku abo paźniej, — zajaviŭ kiraŭnik pres-słužby ministerstva Andrej Maćviejeŭ rasijskamu ahienctvu „Prajm“. — Rašeńnie prymajecca na padstavie indykataraŭ ažyćciaŭleńnia mier pa stabilizacyi ekanomiki, vyznačanych umovami vydzialeńnia kredytu».

Pradstaŭnik Minfina nahadaŭ, što kančatkovaje rašeńnie pavinien prymać saviet Antykryzisnaha fondu JeŭrAzES, jaki ŭznačalvaje vice-premjer, ministr finansaŭ Rasii Alaksiej Kudryn.

«Data pasiadžeńnia savieta pa hetym pytańni pakul dakładna nie vyznačana, ale heta pavinna adbycca nie raniej za kastryčnik hetaha hoda.

Jon padkreśliŭ, što Minfin pastajanna ažyćciaŭlaje manitorynh vykanańnia prahramy reform biełaruskim bokam, a kančatkovaje rašeńnie pa pytańni biełaruskaha kredytu budzie pryniata sumiesna krainam — členami Antykryzisnaha fondu JeŭrAzES.

U adpaviednaści z pahadnieńniem ab vydzialeńni kredytu JeŭrAzES u pamiery 3 młrd. dołaraŭ ZŠA Biełaruś atrymaje hrošy niekalkimi tranšami na praciahu troch hadoŭ: 1,24 młrd. dołaraŭ u 2011 hodzie, kala 800 młn. dołaraŭ — u 2012-m i 1 młrd. — u 2013-m.

Pieršyja 800 młn. dołaraŭ u ramkach kredytu Biełaruś atrymała ŭ červieni. Druhaja častka kredytu abiacana vosieńniu. Dla jaje atrymańnia ŭładam Biełarusi treba vykanać šerah umoŭ, u tym liku — pravodzić žorstkuju biudžetnuju palityku i pamienšyć deficyt biudžetu siektara dziaržkiravańnia.

8 lipienia vice-premjer RF Alaksiej Kudryn, adkazvajučy na pytańni žurnalistaŭ, nie vyklučyŭ, što ŭmovy pradastaŭleńnia Biełarusi stabilizacyjnaha kredytu z AKF buduć pierahledžanyja, kali biełaruski bok nie vykanaje ŭziatyja na siabie abaviazacielstvy. «U mianie skłałasia ŭražańnie, što biełaruskija ŭłady nie prymajuć dastatkova mier dla vychadu z kryzisu», — skazaŭ Kudryn.

Pavodle jaho słoŭ, administracyjnyja miery, jakija vykarystoŭvaje Minsk, nie pryviaduć da azdaraŭleńnia ekanomiki i nie mohuć razhladacca jak antykryzisnyja. Abmiežavańnie impartu, cen i valutnych kursaŭ padčas kryzisu niedapuščalnyja, padkreśliŭ Kudryn. Takim čynam «chvaroba zahaniajecca ŭhłyb», kanstatavaŭ kiraŭnik Minfina RF.

• 0
• 0
• 0
• 0
• 0
• 0
• 0
• 0