Lhoty, jakija pryjdziecca viarnuć

Nie tak daŭno adzin z maich klijentaŭ źviarnuŭsia pa kansultacyju: padatkovaja inśpiekcyja patrabuje dapłacić sumy płaciažoŭ za ziamlu. Ź jaho słoŭ, usio zakonna: učastak pradstaŭleny rašeńniem Minharvykankama, zaklučana damova arendy, arendnaja płata vypłočvajecca ŭ pamiery, vyznačanym u damovie. Dy i padatkovaja inśpiekcyja sama nie tak daŭno pravodziła kompleksnuju pravierku i paćvierdziła pravilnaść vypłaty ŭsich płaciažoŭ. A ciapier na tabie — płaci jašče!

Vyjaviłasia, pryčyna — u rasparadžeńni Prezidenta Respubliki Biełaruś.

Adnak pra ŭsio pa paradku.

U 2007 hodzie Minharvykankam vyłučyŭ arhanizacyi ziamielny ŭčastak u arendu dla absłuhoŭvańnia kapitalnaha budynka. Jak i patrabuje zakanadaŭstva, pamiž arhanizacyjaj i Minharvykankamam była zaklučana damova arendy.

Paradak vyznačeńnia arendnych stavak za ziamielny ŭčastak byŭ urehulavany ŭ toj čas ukazam Prezidenta Respubliki Biełaruś ad 07.02.2006 h. № 74 «Ab udaskanaleńni paradku vyznačeńnia pamieru arendnaj płaty za ziamielnyja ŭčastki, što znachodziacca ŭ dziaržaŭnaj ułasnaści». Ukaz rehłamientavaŭ, što bazavyja staŭki arendnaj płaty za ziamielnyja ŭčastki vyznačajucca vykankamami, zychodziačy z kadastravaha koštu hetych učastkaŭ. Byli taksama ŭstanoŭlenyja kaeficyjenty da kadastravaj vartaści ŭ zaležnaści ad metavaha pryznačeńnia ziamielnaha ŭčastka.

Dadzieny ŭkaz davaŭ prava vykankamam pry zaklučeńni damovaŭ arendy ziamielnych učastkaŭ pavyšać albo panižać ustanoŭlenyja bazavyja staŭki arendnaj płaty za hetyja ŭčastki, ale nie bolš čym u dva razy. Vykankamy pry hetym pavinny byli kiravacca šeraham abstavinaŭ, takich jak: abciažarańnie ŭ vykarystańni ziamielnych učastkaŭ, sacyjalnaja značnaść dziejnaści arandatara, siezonnaść i h.d.

Darečy, Minharvykankam pradastaŭlenym pravam karystaŭsia rehularna: vialikaja kolkaść arhanizacyj vypłočvali płaciažy na ziamlu ŭ mienšym pamiery. Usio heta afarmlałasia ŭ praduhledžanym zakanadaŭstvam paradku: na padstavie rašeńnia Minharvykankama, pryniataha ŭ adpaviednaści z ukazam № 74, unosilisia adpaviednyja źmieny ŭ damovy arendy.

Adnak 19 traŭnia 2011 hoda Prezident Respubliki Biełaruś padpisaŭ rasparadžeńnie № 113rp «Ab niekatorych pytańniach spahnańnia płaty za ziamielnyja ŭčastki ŭ h. Minsku». Jano admianiła pryniatyja raniej rašeńni Minharvykankama ab panižeńni bazavych stavak arendnaj płaty za ziamielnyja ŭčastki.

Rasparadžeńnie Prezidenta nie adnosicca da narmatyŭnych pravavych aktaŭ, tamu nidzie nie publikujecca, i daviedajucca ab im tolki tyja asoby, jakich jano tyčycca. Dy i to praź niejki čas.

Voś i moj klijent daviedaŭsia ab hetym rasparadžeńni tolki tady, kali atrymaŭ list z padatkovaj inśpiekcyi. Padatkovaja paviedamlała, što ŭ suviazi z admienaj nazvanych rašeńniaŭ Minharvykankama, u dadzienaj arhanizacyi ŭźnikła zapazyčanaść pa arendnych płaciažach. Amal ździekam hučała fraza ab pradstaŭlenaj rasterminoŭcy pahašeńnia zapazyčanaści — jaje možna vypłačvać roŭnymi płaciažami na praciahu niekalkich kvartałaŭ.

Nie znajšoŭšy dadzienaha rasparadžeńnia ŭ bazach narmatyŭnych pravavych aktaŭ, ja źviarnuŭsia da internet-krynic. Rasparadžeńnia nie znajšoŭ, zatoje pa paviedamleńniach na adnym z forumaŭ zrazumieŭ, što moj klijent u svajoj biadzie nie samotny — buchhałtary žyva abmiarkoŭvali svaich šefaŭ, jakija ŭžo zapłacili usie płaciažy, a inšyja pryncypova admaŭlajucca heta rabić.

Z adnaho boku, košt pytańnia nie taki istotny — klijent, chutčej za ŭsio, zapłacić paru tysiač dalaraŭ (zapazyčanaść, darečy, była zafiksavanaja ŭ ćviordaj valucie). Dla bujnoha biznesu dobryja stasunki ź dziaržaŭnymi orhanami daražejšyja za hetuju sumu. I biznesmen navat nie budzie brać pad uvahu, što abjekt nieruchomaści, jaki stajaŭ na pakazanym učastku, daŭno pradadzieny, a atrymanyja ad prodažu dyvidendy ŭžo padzieleny pamiž partniorami.

Kryŭdna inšaje — pryniaćcie padobnych rasparadžeńniaŭ vystaŭlaje biznes u našaj krainie zusim u niavyhadnym śviatle pierad inviestarami.

Va ŭkazanym vypadku lhoty pa płaciažach na ziamlu byli na zakonnaj padstavie pradstaŭlenyja ŭ adpaviednaści z ukazam Prezidenta Respubliki Biełaruś i zafiksavanyja dakumientalna.

Akramia taho, artykuł 122 Kanstytucyi Respubliki Biełaruś daje Prezidentu prava admianiać tolki nieadpaviednyja rečaisnaści rašeńni miascovych vykankamaŭ.

U rešcie rešt, navat słavutaja Dyrektyva Prezidenta № 4 «Ab raźvićci pradprymalnickaj inicyjatyvy i stymulavańni dziełavoj aktyŭnaści ŭ Respublicy Biełaruś» čornym pa biełym patrabuje vyklučyć nadańnie zvarotnaj siły narmatyŭnym pravavym aktam, jakija rehulujuć pradprymalnickuju dziejnaść (chiba tolki za vyklučeńniem tych aktaŭ, jakija źmiakčajuć abo admianiajuć adkaznaść ci inšym čynam palapšajuć umovy takoj dziejnaści).

Na nastupnym tydni sustrakajusia z zamiežnym biznesoŭcam, jaki płanuje adkryć svoj biznes u Biełarusi. U telefonnaj razmovie jon žyva cikaviŭsia harantyjami, jakija dziaržava daje inviestaram.

Ciapier navat i nie viedaju, što jamu i skazać…

• 0
• 0
• 0
• 0
• 0
• 0
• 0
• 0