Milicyja praviaraje infarmacyju ab praniknieńni rasijskich błohieraŭ na šerah režymnych abjektaŭ u Minsku, paviedamiŭ pieršy namieśnik načalnika ŭpraŭleńnia pravaparadku i prafiłaktyki MUS Biełarusi major Ivan Kubrakoŭ napres-kanfierencyi 7 vieraśnia.
Siońnia ranicaj u internecie źjavilisia fotazdymki rasijskich błohieraŭ, jakija śćviardžajuć, što biez asablivaj ciažkaści trapili na šerah režymnych, u tym liku asabliva padachoŭnych, abjektaŭ biełaruskaj stalicy. Siarod takich abjektaŭ — stancyi mietro, jakija dziejničajuć i jašče budujucca, aśviatlalnyja mačty stadyjona «Dynama», vieža z hadzińnikam u budynku nasuprać KDB, dach hatela «Biełaruś» i inšyja. Błohiery vykłali fotazdymki, jakija paćviardžajuć ich słovy.
«Infarmacyja praviarajecca.
Kali jana źjaviłasia ŭ internecie, heta jašče nie značyć, što jana adpaviadaje rečaisnaści. A kali infarmacyja paćvierdzicca, budziem raźbiracca, budziem prymać dadatkovyja miery biaśpieki», — zajaviŭ Kubrakoŭ.
Heta ŭžo nie pieršy vypadak praniknieńnia na režymnyja abjekty Minska. Nahadajem, u noč na 29 maja, praz paŭtara miesiaca paśla vybuchu ŭ minskim mietro, na stancyju «Maskoŭskaja» pieršaj linii mietrapalitena praź niezačynienyja dźviery svabodna ŭvajšli troje maładych ludziej. Ni milicyi, ni rabotnikaŭ mietrapalitena nidzie nie było. Videa svajho padarožža pa načnym mietro jany taksama vykłali ŭ internecie.
31 maja na naradzie ab chodzie rasśledavańnia vybuchu na stancyi «Kastryčnickaja» Alaksandr Łukašenka zhadaŭ pra hety vypadak, zajaviŭšy: «Kali hetyja fakty paćvierdziacca, zaŭtra biez pahon zastaniaciesia». Da adkaznaści byli pryciahnuty kiraŭniki i rabotniki mietro, u tym liku načalnik mietrapalitena Mikałaj Andrejeŭ — jon byŭ zvolnieny z pasady, jakuju zajmaŭ pryblizna 12 hadoŭ.
