Achviarami ŭrahanu «Kiryła» ŭ Eŭropie stali bolš jak 30 čałaviek. Tysiačy eŭrapiejcaŭ apynulisia bieź śviatła, sotavaj suviazi i narmalnych transpartnych znosinaŭ. Ciapier, zbaŭlajučy moc, niepahadź rušyć na ŭschod — da Ŭkrainy i paŭdniovych rehijonaŭ Rasiei.
Urahan «Kiryła», jaki nadoječy abrynuŭsia na poŭnač Eŭropy, praciahvaje ruchacca na ŭschod, uhłyb kantynentu. Za praminułyja sodni achviarami ŭrahanavych vietraŭ stali ŭžo bolej 30 žycharoŭ eŭrapiejskich krainaŭ. Pieršymi adčuli na sabie «Kiryłavu» moc u Vielikabrytanii. Jak paviedamlali brytanskija metearolahi, chutkaść vietru tam dasiahała 44 m/s. Heta novy rekord dla krainy sa studzienia 1990 h. Pavodle źviestak Bi‑Bi‑Si, urahan spryčyniŭsia da hibieli sama mieniej dzieviaci brytancaŭ. Associated Rress paviedamlaje pra dziesiać achviar u hetaj krainie. Siarod achviaraŭ urahanu — chłopčyk, na jakoha ŭ Londanie abrynułasia ściana. 80 tys. brytancaŭ zastalisia biez elektraenerhii. Asabliva paciarpieli paŭdniovyja rajony krainy, dzie praktyčna całkam paralizavaŭsia ruch transpartu i byli paškodžanyja budynki, zaznačaje Reuters.
U Francyi mocnyja paryvy vietru i zalevy spryčynilisia da śmierci dvoch čałaviek, u Niderlandach — čatyroch, u Belhii — dvoch. Troje zahinuli ŭ Čechii. Ale hetyja ličby ŭdakładniajucca pastajanna.
U Niderlandach paryvisty viecier chutkaściu 36 m/s staŭsia pryčynaj niekalkich surjoznych incydentaŭ. U horadzie Utrechcie na budynak universytetu ŭpaŭ padjomny kran, atrymali kalectvy try čałavieki. Na budynku centralnaha vakzału ŭ Amsterdamie viecier paškodziŭ šklany dach. Dziela askiepkaŭ, što padajuć dołu, pasažyram zabaranili zachodzić na platformy, a ciahniki spyniajucca, nie dajaždžajučy da vakzału. U porcie Raterdamu na prystań vykinuła sudzinu. Udar trapiŭ na naftavyja rezervuary, paśla čaho nafta vyliłasia ŭ mora. U Francyi stychija stałasia pryčynaj karablekrušeńnia: na paŭnočnym zachadzie krainy, blizu vyspy Ŭesan u Atlantyčnym akijanie, paciarpieŭ krušeńnie brytanski kantejneravoz MS Napoli. 26 čalcoŭ ekipažu paśpieli pakinuć sudzinu na ratavalnym bocie.
Pad viečar u čaćvier «Kiryła» dajšoŭ da Niamieččyny.
Chutkaść vietru tut dasiahała 32 m/s. Maksymalnaja stupień tryvohi abvieščanaja amal na dźviuch tracinach terytoryi krainy, u astatnich rajonach — štarmavoje papiaredžańnie. Režym nadzvyčajnaj sytuacyi abviaściła pažarnaja achova Berlinu, jakaja vykonvaje funkcyi rataŭničaj słužby. Jak paviedamiŭ aficyjny pradstaŭnik słužby, na poŭdni Berlinu paryvy vietru dasiahali 30 m/s. Niekalki vulicaŭ zalityja vadoj, parušanyja aŭtamabilnyja znosiny. Vada pratačyłasia ŭ padziemnyja kamunikacyi, u niekatorych rajonach horadu parušyłasia telefonnaja suviaź, adznačalisia pieraškody pryjomu syhnałaŭ sa spadarožnikaŭ i ŭ rabocie sotavaj suviazi. Na likvidacyi nastupstvaŭ stychii zadziejničanyja 1,5 tys. supracoŭnikaŭ pažarnaj słužby. U Niamieččynie zahinuli ad dvoch da piacioch čałaviek, dakładny lik ciapier vyjaśniajecca. Siarod achviaraŭ urahanu — dzicia paŭtara hadoŭ ź Miunchenu, na jakoha ŭpali dźviery, vyrvanyja paryvam vietru. Dzicia pamierła ad atrymanych traŭmaŭ u bolnicy.
Dziasiatki tysiač čałaviek nia zdoleli dabracca, kudy im treba, dziela pierarvanaha ŭrahanam ruchu transpartu.
Dziela mocnaha vietru dziaržsakratar ZŠA Kandaliza Rajs musiła skaracić svoj vizyt u Berlin, kab paśpieć vylecieć u Londan da krytyčnaha paharšeńnia pahodnych umovaŭ. Jejny latak pryziamliŭsia ŭ Chitraŭ u viecier, što dasiahaŭ 36 m/s. Tut skasavali bolš jak 280 rehularnych avijarejsaŭ. Usie vylety letakoŭ paskasoŭvali ci zatrymali ŭ Irlandyi. Kraina spyniła paromnyja znosiny ź Vielikabrytanijaj dy Francyjaj. U aeraportach inšych bujnych haradoŭ, ułučna z Frankfurtam, Miunchenam, Amsterdamam dy Vienaj, taksama adbyvalisia zatrymki i skasavańni rejsaŭ.
Pierarvany ruch ciahnikoŭ Eurostar z Brytanii na materyk: elektrakabel upaŭ na čyhunku pad paŭnočnym francuskim horadam Lilem. U Niamieččynie spyniła pracu dziaržaŭnaja čyhunka.
Pieramiaščajučysia ŭhłyb materyka, «Kiryła» pakrysie straciŭ moc. Chutkaść vietru źniziłasia. Ale va Ŭkrainie dy ŭ niekatorych paŭdniovych rehijonach Rasiei abvieščanaje štarmavoje papiaredžańnie.
Jašče ŭ čaćvier Hidrametcentar Ukrainy abvieściŭ pa ŭsioj terytoryi krainy štarmavoje papiaredžańnie. Pad upłyvam aktyŭnaha cyklonu 19—20 studzienia tut čakajuć štarmavy viecier chutkaściu da 25 m/s i doždž sa śnieham. U Karpatach, a taksama ŭ harach Krymu chutkaść vietru budzie dasiahać 40 m/s. U raŭninnaj častcy paŭvyspy čakajuć paryvy vietru da 30 m/s i bahatyja apadki — mocnyja zalevy dy mokry śnieh. Žycharom Krymu rekamendujuć być pilnymi, u tym liku nie znachodzicca pobač ź linijami elektrapieradačaŭ, skasavać ekskursii dy vychady ŭ mora.
Štarmavoje papiaredžańnie raspaŭsiudžanaje na Kalininhradzkuju vobłaść. Synoptyki prahnazujuć tut vychad vialikaha, mocnaha dy hłybokaha cyklonu z Atlantyki. U piatnicu čakajecca ŭzmacnieńnie vietru zachodniaha i paŭnočna‑zachodniaha napramkaŭ. Jahonyja paryvy buduć dasiahać 25—30 m/s. Paŭdniova‑zachodni cyklon nasoŭvajecca i na azoŭskaje ŭźbiarežža Krasnadarskaha kraju. Ranicaj i ŭdzień 19 studzienia čakajecca ŭźmacnieńnie vietru, chutkaść jakoha moža dasiahać 22—24 m/s, z paryvami da 30 m/s i bolej. Prahnazujecca vyšynia chvalaŭ u Azoŭskim mory — da 2 m.
Zdymak z sajtu hazieta.ru
