Centralnyja aficyjnyja ŚMI padrychtavali repartažy ź pieršaha dnia pracesu pa spravie vybuchu ŭ mietro. Bolšaść ź ich padrabiazna apisvaje padziei ŭ sudzie. Praŭda, niekatoryja ź ich nie ŭtrymalisia ad spakusy pryviazać da spravy apazicyju dy «nie zaŭvažyć» na sudzie peŭnyja istotnyja momanty.
«Hety fakt (pryznańnie Kanavałavym svajoj viny ŭ ździajśnieńni vybuchu ŭ mietro — nn.by) napeŭna prymusiŭ razhubicca niekatorych ekśpiertaŭ, jakija šmat havaryli, što za teraktam stajać biełaruskija śpiecsłužby. Siarod ich, naprykład, niechta Uładzimir Baradač. Praŭda, paśla siońniašnich pryznańniaŭ abvinavačanych atrymałasia, što apazicyjnyja aktyvisty baroniać ni bolš ni mienš — terarystaŭ, žadajučy zrabić ich achviarami režymu», — rapartavaŭ va ŭčorašnim vypusku navinaŭ karespandent Pieršaha nacyjanalnaha. Varta adznačyć, što za publikacyju kamientara byłoha pałkoŭnika śpiecnaza Baradača «Naša Niva» atrymała ŭ krasaviku papiaredžańnie ad prakuratury.
Hazieta «Sovietskaja Biełoruśsija» pieraličyła amal usie chadajnictvy, zajaŭlenyja paciarpiełymi ŭ vyniku teraktu: i zabaronu na zdymki abvinavačanych, i prośbu zaprasić u jakaści śviedki supracoŭnika ahienctva nieruchomaści, praź jakoje abvinavačany Kanavałaŭ źniaŭ kvateru. A voś pra chadajnictva prypynić praces da admieny śmiarotnaha pakarańnia — ni słova. Nie zhadali pra jaho i ŭradavyja «Źviazda» i «Respublika», a taksama ahienctva BiełTA, jakoje ładzić z Doma pravasudździa anłajn-repartaž. A voś «Narodnaja hazieta» napisała pra heta, adznačyŭšy, što chadajnictva było adchilenaje, bo pytańnie nie ŭvachodzić u kampietencyju suda.
Nahadajem, što praces pra spravie teraktu ŭ mietro pačaŭsia 15 vieraśnia 2011 h. Praciah pasiedžańnia 19 vieraśnia, u paniadziełak. Pačatak ab 11-j.
