Zhurtavańnie biełarusaŭ śvietu «Baćkaŭščyna» atrymała adkaz Ministerstva zamiežnych spraŭ Biełarusi na paŭtorny zvarot z prośbaj patłumačyć pryčyny anulavańnia ŭjaznoj vizy ŭ Respubliku Biełaruś Jaŭhienu Vapu — staršyni ŭpravy «Radyjo Racyja», hałoŭnamu redaktaru tydniovika biełarusaŭ u Polščy «Niva», siabru Kansultacyjnaj Rady pa spravach biełarusaŭ zamiežža pry Ministerstvie kultury, siabru Vialikaj Rady «Baćkaŭščyny».
U liście, padpisanym namieśnikam ministra Siarhiejem Alejnikam, havorycca, što «dać infarmacyju ab pryčynach anulavańnia vizy dla ŭjezda ŭ Respubliku Biełaruś hramadzianinu Respubliki Polšča Jaŭhienu Vapie nie pradstaŭlajecca mahčymym».
Pry hetym u liście dajecca spasyłka na artykuł 31 Zakona Respubliki Biełaruś «Ab pravavym stanoviščy zamiežnych hramadzian i asob biez hramadzianstva ŭ Respublicy Biełaruś» ad 4 studzienia 2010 h. № 105-3, zhodna ź jakim orhany, jakija pryniali rašeńnie ab admovie va ŭjeździe ŭ Respubliku Biełaruś abo anulavańni vizy dla ŭjezda ŭ Respubliku Biełaruś, nie abaviazany infarmavać zamiežnaha hramadzianina, jaho svajakoŭ i pradstaŭnikoŭ ab padstavach pryniaćcia takoha rašeńnia.
Taksama ŭ liście adznačajecca, što artykułam 20 Pahadnieńnia pamiž Uradam Respubliki Biełaruś i Uradam Respubliki Polšča ab uzajemnych pajezdkach hramadzian ad 20 śniežnia 2007 h. ustanoŭlena, što pałažeńni Pahadnieńnia «nie abmiažoŭvajuć prava kampietentnych orhanaŭ dziaržavy adnaho boku admović va ŭjeździe abo abmiežavać termin prabyvańnia na terytoryi svajoj dziaržavy hramadzianam dziaržavy druhoha boku, kali heta vyciakaje z pałažeńniaŭ nacyjanalnaha zakanadaŭstva».
Nahadajem, Jaŭhien Vapa źjaŭlajecca siabram Vialikaj Rady Zhurtavańnia «Baćkaŭščyna» i mienavita pa zaprašeńni «Baćkaŭščyny» jon atrymaŭ słužbovuju vizu dla ŭjezdu ŭ Biełaruś. 23 traŭnia pry pierasiačeńni biełaruskaj miažy biełaruskija pamiežnyja słužby anulavali vizu Jaŭhienu Vapu, nie puściŭšy takim čynam na terytoryju Biełarusi. Pryčyny takoha rašeńnia Pasolstva Respubliki Biełaruś u Varšavie nazvać admoviłasia.
U suviazi z hetym Zhurtavańnie biełarusaŭ śvietu «Baćkaŭščyna» źviarnułasia ŭ MZS Biełarusi z prośbaj patłumačyć pryčyny anulavańnia vizy. Na pieršy list MZS nijak nie adreahavała. Adkaz «Baćkaŭščyna» atrymała tolki paśla paŭtornaha zvarotu ŭ MZS, u jakim spasłałasia na Zakon Respubliki Biełaruś ad 18 lipienia 2011 h. № 300-Z «Ab zvarotach hramadzian i jurydyčnych asob».
Adznačym, što Jaŭhien Vapa źjaŭlajecca aktyŭnym hramadskim dziejačam biełaruskaj nacyjanalnaj mienšaści ŭ Polščy, staršynioj Biełaruskaha sajuza ŭ Polščy. Šmat u čym dziakujučy jaho dziejnaści biełaruskaja mienšaść u Biełastoččynie zachavałasia i aktyŭna dziejničaje na hramadska-kulturnaj nivie. Nie zvažajučy na ŭsio heta, Biełaruś — kraina-Radzima — stała dla Jaŭhiena Vapy niedasiažnaj.
Kamientary