Rabaŭniki kinuli ŭ žychara Bresta siakieraj, ale toj adbiŭsia

Alik, Hryša i Kościa (imiony źmienienyja) lubili hrošy, ale ŭ asnoŭnym biez uzajemnaści. Alik prajšoŭ niekalki razoŭ śpiecyfičnyja «ŭniviersitety», ale šanavać Kryminalny kodeks tak i nie pryzvyčaiŭsia. Niejak, budučy na volnym chlebie, daviedaŭsia jon, što jość u Breście čałaviek z hrašyma i kaštoŭnaściami. Jak daśviedčany śpiecyjalist, pravioŭ rekahnascyroŭku na miescy, zatym znajšoŭ vykanaŭcaŭ — Hryšu i Kościu. Raspavioŭ im, dzie žyvie budučy paciarpieły, jak raźmieščany pakoi ŭ jaho kvatery, i ŭdakładniŭ, jakoj pavinna być zdabyča: 30 000 dalaraŭ i kuča zołata.

Pamiatajecie, jak u «Apieracyi «Y» išli na spravu Byvały, Bałbies i Bajaźliviec? Džyhnuli tolki pa šklancy kiefiru. U našym realnym vypadku Alik na spravu nie pajšoŭ, a pradstaŭlenyja sami sabie Hryša i Kościa vypili dla kuražu biełaha, ale nie kiefiru, načapili na hałovy paryki, jakija adšukali ŭ sklepie na vulicy Bahdančuka. Kościa ŭzbroiŭsia pnieŭmatyčnym pistaletam, zaradžanym mietaličnymi šarykami, Hryša, choć Dastajeŭskaha nie čytaŭ, uziaŭ siakieru.

Usio, zdavałasia, budzie prosta. Patelefanavali ŭ dźviery kvatery. Haspadar bieskłapotna adčyniŭ i ŭbačyŭ prystaŭleny da hałavy pistalet. Padparadkoŭvajučysia zahadu, adyšoŭ u hłyb piaredniaha pakoju. Tut ža pobač z Kościem namalavaŭsia Hryša. Kościa zahadaŭ haspadaru lehčy na padłohu, a toj zamiest hetaha advioŭ pistalet ad svajho tvaru. Hryša razzłavaŭsia i chacieŭ udaryć jaho siakieraj u hałavu, ale haspadar prykryŭsia rukoj i staŭ adstupać. Kościa pasprabavaŭ strelić, ale ŭ hazavym bałonie pistaleta nie chapiła cisku i streł nie atrymaŭsia.

Hryša ž, padobna Činhačhuku, špurnuŭ u vidavočna «niapravilnaha» paciarpiełaha siakieru. Instrumient stuknuŭsia ab tors haspadara i ŭpaŭ na padłohu. Haspadar i padniaŭ jaho, pryčym vidavočna nie źbiraŭsia addavać Hryšy. Nalotčyk zrazumieŭ heta i puściŭsia naŭcioki. Za im padaŭsia i Kościa, adstrelvajučysia na chadu. Adnak ni adzin paražalny elemient-šaryk tak i nie pakinuŭ kanała stvała.

Haspadar kvatery, jaki adbiŭsia ad napadu, atrymaŭ lohkija cialesnyja paškodžańni ŭ vyhladzie siniakoŭ, ranki i paviarchoŭnaj siečanaj rany pieradplečča. Uziatyja pa haračych śladach Hryša i Kościa paviedamili, što jany tolki vykanaŭcy, a «mozh» apieracyi — Alik. Supracoŭniki śledčaha adździeła Maskoŭskaha RAUS praviali nieabchodnyja śledčyja dziejańni i addali spravu prakuroru dla pieradačy ŭ sud. Niadaŭna sud Maskoŭskaha rajona sprava razhledzieŭ. Kościa asudžany da 8 hadoŭ i 3 miesiacaŭ pazbaŭleńnia voli, Hryša — da 9 hadoŭ pazbaŭleńnia voli. Alik — da 11 z pałovaj hadoŭ pazbaŭleńnia voli. Usie troje buduć utrymlivacca ŭ papraŭčaj kałonii va ŭmovach uzmocnienaha režymu, va ŭsich kanfiskavana majomaść.

• 0
• 0
• 0
• 0
• 0
• 0
• 0
• 0