Andrej Kabiakoŭ: Miery, što prymajucca ŭładami pa pieraadoleńni kryzisu, efiektyŭnyja

Namieśnik Administracyi prezidenta Biełarusi Andrej Kabiakoŭ zajaviŭ ab efiektyŭnaści mier, što prymajucca ŭładami pa pieraadoleńni kryzisu.

«Jość pieradumovy da taho, što da kanca hoda prablemy na valutnym rynku buduć pieraadoleny»,

U pryvatnaści, pavodle słoŭ Kabiakova, namiecilisia stanoŭčyja tendencyi ŭ źniešnim handli. «U 2010 hodzie admoŭnaje salda skłała da 14% VUP. Miž tym, pačynajučy z krasavika-červienia, namieciłasia tendencyja vyraŭnoŭvańnia handlovaha salda. Za lipień upieršyniu za doŭhija hady skłałasia stanoŭčaje salda ŭ pamiery 380 młn. dołaraŭ», — skazaŭ namieśnik kiraŭnika administracyi prezidenta.

Biahučaje admoŭnaje salda nižejšaje pa svaim absalutnym značeńni, čym ŭ 2010 hodzie, paviedamiŭ Kabiakoŭ. «Ciapier ad hrafika 2010 hoda my idziem lepš na 327 miljonaŭ dołaraŭ», — dadaŭ jon.

Pry hetym Kabiakoŭ nahadaŭ, što mienavita deficyt źniešniaha handlu źjaŭlajecca adnoj z pryčyn valutnaha kryzisu ŭ krainie. Sa stabilizacyjaj situacyi ŭ źniešnim handli budzie vyrašacca i prablema na valutnym rynku, padkreśliŭ namieśnik kiraŭnika prezidenckaj administracyi.

Pavodle jaho słoŭ, da prablem na valutnym rynku pryvioŭ značny za apošnija hady rost cen na enierhanośbity. «Ale, niahledziačy na ŭsie ciažkaści, kraina zachoŭvaje vysokuju inviestycyjnuju aktyŭnaść. U nas udzielnaja vaha inviestycyj u asnoŭny kapitał za minuły hod — 38%», — zajaviŭ Kabiakoŭ.

Takaja ŭdzielnaja vaha, adznačyŭ jon, dazvalaje zabiaśpiečvać pašyranaje ŭznaŭleńnie asnoŭnych srodkaŭ. «Pry hetym u našych asnoŭnych handlovych partnioraŭ hety pakazčyk składaje 20–22%», — zaŭvažyŭ namieśnik kiraŭnika administracyi.

Kabiakoŭ padkreśliŭ: aktyŭnaja inviestycyjnaja palityka, nacelenaść na madernizacyju patrabujuć pavyšanych zatrat i źjaŭlajucca pryčynaj praviadzieńnia makraekanamičnaj karekcyi.

Jon taksama nahadaŭ ab palitycy, jakaja pravodzicca ŭ Biełarusi, pa vyraŭnoŭvańni cen z Rasijaj — «kab nie dapuścić masavaha vyvazu tavaraŭ za miežy krainy». Častkova ŭ suviazi z hetym za vosiem miesiacaŭ inflacyja skłała 53,6%, dapoŭniŭ Kabiakoŭ.

Miž tym, adznačyŭ jon, ułady pa miery mahčymaha pravodziać sacyjalnuju palityku, nacelenuju na pavyšeńnie hrašovych dachodaŭ nasielnictva. «Dumaju, da kanca hoda my ŭ asnoŭnym pavinny spravicca z usimi prablemami»,- upeŭnieny Andrej Kabiakoŭ.

• 0
• 0
• 0
• 0
• 0
• 0
• 0
• 0