Na miescy pažaru ŭ kijosku «Biełsajuzdruk» u Viciebsku ŭ adnu z načej červienia 2004 hoda nie było znojdziena reštkaŭ vybuchovych pryład, naprykład płastykavaj butelki, niejkich detalaŭ. Heta vynikaje z frahmientaŭ začytanaha 10 kastryčnika ŭ sudzie pa spravie Dźmitryja Kanavałava i Uładzisłava Kavalova pratakoła ahladu miesca zdareńnia supracoŭnikami haradskoha adździeła pa nadzvyčajnych situacyjach i dopytu adnaho ź jaho padpisantaŭ Maksima Duka. Sudu jon kateharyčna zajaviŭ, što kali ŭ pratakole niama takich źviestak, značyć, nijakich reštkaŭ vybuchovych pryład znojdziena nie było.
Pry hetym Duk śćviardžalna adkazaŭ na pytańnie, ci mahła być vykarystana dla ŭčynieńnia pažaru zapalnaja vadkaść. Pryčynaj pažaru, što ŭźnik pamiž dacham i kazyrkom, pavodle jaho słoŭ, staŭ padpał — «zaniasieńnie pabočnaj krynicy ŭzharańnia», usie materyjały pieradavalisia ŭ milicyju, jakaja pavinna była pryznačyć ekśpiertyzu.
Jak paviedamiŭ Duk, unutry kijoska paškodžańniaŭ, pryčynienych pažaram, nie było.
Pavodle słoŭ Taćciany Cimafiejevaj, jakaja pracavała ŭ hetym kijosku, tavar u im byŭ pryviedzieny ŭ nieprydatnaść padčas tušeńnia ahniu pažarnaj pienaj. Suma ŭronu joj nieviadoma.
