U Mahilovie 13 kastryčnika dapytana žurnalistka Alina Skrabunova pa spravie pra abraźlivyja vykazvańni na adras sudździ Leninskaha rajona Mahilova Iryny Łančavaj, raźmieščanych u kamientaryjach karystalnikaŭ na sajcie «Chartyja'97».
Alina Skrabunova była vyklikanaja ŭ prakuraturu Mahiloŭskaj vobłaści pa telefonie. «Mnie było prosta cikava, što jany skažuć», — rastłumačyła BiełaPAN Skrabunova svoj vizit u prakuraturu biez pozvy. Akazvajecca, 7 lipienia na sajcie «Chartyi'97» u adnym z kamientaraŭ byli raźmieščanyja vykazvańni na adras sudździ Leninskaha rajona Mahilova Iryny Łančavaj, rascenienyja prakuraturaj jak abraźlivyja.
Pry hetym sama sudździa, jak raskazała Skrabunova, nijakaj zajavy ŭ pravaachoŭnyja orhany nie padavała.Akramia taho, žurnalistka nahadała, što jana asabista ŭ toj čas znachodziłasia ŭ IČU UUS Mahiloŭskaha abłvykankama jak aryštavanaja za ŭdzieł u akcyi maŭklivaha pratestu i asudžanaja sudździoj Leninskaha rajona Aksanaj Ratnikavaj.
Na dopyt u prakuraturu žurnalistka pajšła razam z pravaabaroncam Barysam Buchielem. Jaje dapytvaŭ staršy śledčy śledčaha adździeła prakuratury Mahiloŭskaj vobłaści Pavieł Starykaŭ. «Naohuł nierazumna, što jany mianie vyklikali, u mianie naohuł niama łahičnaha tłumačeńnia ich dziejańniam. U internecie šmat abraźlivych vykazvańniaŭ na adras ludziej, jakija zajmajuć bolš vysokuju pasadu, čym Łančava, ale pra padobnyja rasśledavańni čamuści ničoha nie čuvać. Śledčy skazaŭ, što kamuści treba heta rasśledavańnie», — raskazała Skrabunova, adznačyŭšy, što jana tolki paśmiajałasia z padobnych dziejańniami.
Jak adznačyła žurnalistka, padčas hutarki śledčy prasiŭ nazvać žurnalistku adrasy svajoj elektronnaj pošty i łahin u internecie, ale Skrabunova admoviłasia paviedamlać hetyja źviestki. Taksama, pavodle jaje słoŭ, śledčy vykazaŭ zadavalnieńnie, daviedaŭšysia, što Skrabunova karystajecca pasłuhami pravajdara «Biełtelekam».
Jak adznačyŭ Barys Buchiel, paśla raźmiaščeńnia na sajcie «Chartyja'97» infarmacyi pra ŭčarašni dopyt žurnalistki, na adras sudździ Łančavaj źjaviłasia šmat novych kamientaraŭ, jakija taksama mohuć być rascenienyja prakuraturaj jak abraźlivyja.
Nahadajem,
sudździa Iryna Łančava sioleta vynosiła abvinavaŭčyja pryhavory žurnalistam Alesiu Asipcovu i Uładzimiru Łapceviču, hruntujučysia na pakazańniach vyklučna supracoŭnikaŭ milicyi.
