U ekanomii enierharesursaŭ bolš aktyŭny ŭdzieł pavinna pryniać nasielnictva. Takuju dumku vykazaŭ ministr žyllova‑kamunalnaj haspadarki Uładzimir Biełachvostaŭ 26 studzienia na pres‑kanfierencyi ŭ Minsku.
Jon adznačyŭ, što za apošnija hady ŭ Biełarusi mnohaje zroblena pa źnižeńniu enierhaspažyvańnia ŭ žyllovym fondzie. Šmatkvaternyja žyłyja damy (ad 20 kvater i bolš) abstalavany hrupavymi ličylnikami spažyvańnia ciepłavoj enierhii i sistemami rehulavańnia, a taksama vadamierami. Heta dało mahčymaść źnizić u 2006 hodzie spažyvańnie ciepłavoj enierhii na 10 pracentaŭ u paraŭnańni z 2003 hodam, kali była pačata rabota pa ŭstanoŭcy ličylnikaŭ.
Pavodle słoŭ Uładzimira Biełachvostava, u žyłym fondzie jašče jość «vialiki rezierv ekanomii». U pryvatnaści, płanujecca na praciahu hoda ŭvieś šmatkvaterny žyły fond abstalavać indyvidualnymi ličylnikami na vadu. Pryniata rašeńnie ab tym, što takija ličylniki hramadzianie zmohuć ustanaŭlivać u rasterminoŭku ‑ pradpryjemstvy ŽKH buduć pryciahvać kredyty na hetyja mety. Ministr nahadaŭ, što hramadzianie, jakija ŭstanaŭlivajuć ličylniki za košt ułasnych srodkaŭ, atrymajuć 20‑pracentnuju lhotu ŭ apłacie vady.
Praktyka pakazvaje, što raschod vady ŭ kvaterach, abstalavanych ličylnikami, źnižajecca ŭ siarednim u 2‑3 razy. Heta daść mahčymaść ekanomić srodki nie tolki nasielnictvu (prykładna da Br20 tys. u miesiac), ale i biudžetnyja srodki, tamu što apłata nasielnictvam vady tolki častkova pakryvaje jaje košt.
Uładzimir Biełachvostaŭ taksama adznačyŭ, što abrevijatura «ŽKH» nabyvaje novy sens: «Žyvi jak haspadar». Heta datyčycca i ekanomii resursaŭ, i nieabchodnaści «dać kožnamu domu haspadara ‑ domakiraŭnika». Amal 83 pracenty kvater žyłoha fondu pryvatyzavana, i hramadzianam nieabchodna vyznačycca z formaj praŭleńnia ŭ svaim domie, padkreśliŭ ministr.
Fota phillumania.narod.ru
