Ujavicie sabie situacyju: padača vady ŭ kvatery ŭ vašym domie całkam zaležyć ad najaŭnaści elektraenierhii. Luboje adklučeńnie śviatła choć na niekalki siekund aŭtamatyčna ciahnie za saboj adklučeńnie vady. I heta nie samaje strašnaje. Jana nieŭzabavie źjavicca, ale ŭ vyhladzie buraj vadkaści ź niepryjemnym pacham, jakuju daviadziecca źlivać paŭhadziny i bolej.
Jašče ŭjavicie, što časta elektryčnaść u vašym domie źnikaje ŭ časie mocnaj navalnicy. Heta značyć, što ad maja da vieraśnia vam davodzicca pa niekalki razoŭ na tydzień źlivać «šakaład».
Abo taki vypadak. Vy zahruzili ŭ pralnuju mašynu bializnu, a niedzie pasiaredzinie pracesu ŭ vas adklučyli vadu. Na niekalki chvilin, vy navat nie zaŭvažyli. Ale hetaha dastatkova, kab mašynka nasmaktałasia iržy i vaša bializna «pafarbavałasia».
Naturalna, takaja vada małaprydatnaja i dla pryhatavańnia ježy. Tamu śmieła dadavajcie da ličbaŭ u žyroŭcy paŭsotni tysiač rubloŭ za filtr dla vady. Rehularnaje źlivańnie brudnaj vady paśla ŭviadzieńnia narmatyvu raschodu vady ŭ 140 litraŭ na čałavieka ŭ sutki stanie nie tolki žyćciovaj, ale i darahoj nieabchodnaściu.
Apisanyja vyšej prykłady — z realnaha žyćcia našaha Zasłaŭja, horada sa statusam spadarožnika stalicy. I nie važna — žyviacie vy ŭ staroj «chruščobie», ci ŭ zusim novym domie — heta ahulnaja prablema.
Voś i zaraz, u siaredzinie kastryčnika, u Mikrarajonie №2 Zasłaŭja na tydzień adklučyli haračuju vadu. Miascovaja ŽKH abhruntoŭvaje «časovyja niazručnaści» zamienaj ciepłatrasy. Pytańnie, čamu hetaha nie zrabili heta letam, zastajecca biez adkazu.
Prakładajuć kamunikacyi ŭ hetyja dni i kala miascovaha Pałacu kultury. Pracy tut pačalisia ŭ siaredzinie vieraśnia, što paćvierdzić luby miascovy žychar, choć akurat u hetym miesiacy jany musili ŭžo skončycca.
«Z małoha pačynajecca hłabalnaje»
Alena Palakova z tych minčukoŭ, što niekalki hadoŭ tamu pierabralisia žyć u pryharad. Zasłaŭje — horad ź lepšaj, čym u stalicy, ekałohijaj, siudy zručna dabiracca. Palakovy pasialilisia ŭ novy dom, zbudavany ŭ 2007-m. Ale heta nie zaścierahło ich ad pobytavych niazručnaściaŭ. Rehularnyja adklučeńni śviatła i brudnaja vada z kranaŭ — heta tolki niekalki prykładaŭ. Žychary doma nieadnojčy ŭzdymali «vodnaje» pytańnie na sustrečach ź miascovymi ŭładami, ale biezvynikova.
«Zasłaŭje — horad-spadarožnik. Prahrama raźvićcia jaho vielmi niebłahaja. Ale na praktycy amal nie realizujecca», — kaža Alena Palakova. Na jaje dumku, pačynać treba akurat z małoha. Kamfortnaje žyllo biez kamunalnych prablem, infrastruktura — ad dziciačych placovak i zialonaj zony da jakasnych daroh.
Nielha zbudavać turystyčny raj u miastečku, dzie žyvuć nieŭładkavanyja i złyja na los žychary. Ale biada ŭ tym, što prosty čałaviek nie ŭpłyvaje na rašeńni ŭładaŭ. Toj ža biudžet, ni farmavańnie, ni vykarystańnie jakoha ad mieścičaŭ nijak nie zaležyć.
Pad Zasłaŭjem na hrabnym kanale ŭstalavali za biudžetnyja hrošy samaje vialikaje ŭ Biełarusi śviatłodyjodnaje tabło, zatoje ŭ samim horadzie paśla mocnaha daždžu ŭ dvarach možna ŭtapicca ŭ kalužynach.
U domie Palakovych taksama časova adsutničaje haračaja vada — pobač budujecca novy dom, akurat ciapier idzie prakładka kamunikacyj. Ironija losu ŭ tym, što siarod inšych u navabud u chutkim časie mahčyma zasielacca i siemji miascovych čynoŭnikaŭ, ad jakich i zaležyć vyrašeńnie haradskich prablem. I kali situacyja nie źmienicca, jany sami stanuć zakładnikami kamunalnych siurpryzaŭ. «My ŭsie žyviom u adnym horadzie. I nie chočacca čakać, što čynoŭniki voźmucca za vyrašeńnie prablem tolki paśla taho, jak apynucca ŭ našaj skury. Chočacca narmalna žyć tut i ciapier», — dumajecca, pad hetymi słovami padpišucca žychary nie tolki haradoŭ-spadarožnikaŭ.
